کوئٹہ، بلوچستان: دزگیریں بلوچ یکجہتی کمیٹی ءِ سروک ڈاکٹر ماہ رنگ بلوچ ءَ چہ کوئٹہ ھُدا جیل ءَ شنگ بوتگیں یک بیانے ءِ تہ ءَ گْوشتگ کہ بلوچستان ءِ تہ ءَ عدلیہ چہ وتی اثر ءُ رسوخ ءُ لس مھلوک ءِ بھروسہ ءَ سرجم ءَ گار بوتگ اَنت۔ عدلیہ کہ یک زمانگے ءَ راج ءَ را انصاف ءِ سر کنگ ءِ ذمہ وار بوتگ نوں ریاستی ادارہانی آسراتی ءِ بستار ءَ کار کنگ ءَ اِنت ءُ انصاف ءِ لوٹاں پادمال کنگ ءَ اِنت۔
آئی ءَ گوشت کہ بلوچستان ءِ چیف جسٹس کامران ملاخیل بی وائی سی ءَ گوں سیادی داروکیں درستیں کیس آنی سر ءَ ذاتی رنگ ءَ نگرانی کنگ ءَ اِنت ءُُ آئی ءِ سروکی ءَ جسٹس محمد علی موبین، جسٹس قادر شاہ بخاری ءُُ سرجمیں بلوچستان ءَ بی وائی سی ءِ کیس آناں گوشداروکیں درستیں جج آناں 2019 ءِ رد ءَ براہ راست ریاستی فیصلہ ءِ جار جنگ ءِ ذمہ واری داتگ۔ آئی ءَ گوشت کہ اے وڑیں جاور آنی تہ ءَ عدلیہ ءِ بے رھبند ءُُ آجوئی ھلاس بوتگ۔
بی وائی سی ءِ سروک ءَ گشتگ کہ 2019 ءِ کیس ءِ سرا … گلزادی بلوچ . عدالت ءِ رھبند ءِ یک ھاسیں مثالے ۔ پریزیڈنگ جج ءَ بازیں رند ءَ گشتگ کہ آ دباؤ ءِ تہا انت ءُُ آئی ءَ را اے کیس ءِ تہا سزا ءِ دیم دیگ ءِ ہدایت کنگ بوتگ، اے دعویٰ عدالتی آجوئی ءُُ غیر جانبداری ءِ بابت ءَ سنگینیں جُست ءُُ پُرس ءِ سبب جوڑ بیت۔ آئی ءَ گوشت کہ 7ستمبر ءَ آمید گس ءِ ہڑتال ءُُ مدافعی وکیل ءِ نہ بوھگ ءَ ابید گلزادی بلوچ ءِ کیس ءِ کارروائی برجاہ بوتگ ءُُ مدافعی وکیل ءِ نہ بوھگ ءَ گواہ ءِ کراس انکوائری کنگ بوتگ۔ آئی ءَ گوشت کہ اے گپ دفاع ءِ بنیاتی حق ءُُ منصفانہ مقدمہ ءِ اصول ءِ بابت ءَ سنگینیں جُست چست کنت۔
آئی ءَ گوشت کہ ھمے رنگ ءَ وتی کیس آنی تہ ءَ سرکاری نامینتگیں وکیل آنی رضامندی ءِ ھلاپ ءَ دیم دیگ بوتگ ءُُ آ گوں جتا جتائیں مراعات آنی گوما اسلام آباد ءَ آرگ بوتگ اَنت وھدے کہ آ وت دفاع ءِ بنیاتی ھک ءَ چہ زبھر کنگ بوتگ اَنت۔ آئی ءَ جُست کُت کہ اے اسلامی جمہوریہ پاکستان ءِ انصاف اِنت کہ آمیدگس آزاتیں پیسلہ کنگ ءِ بدل ءَ ایوک ءَ ریاستی ادارہانی داتگیں پیشگی فیصلہانی دیم ءَ آرگ ءَ اَنت؟
آئی ءَ گْوشتگ کہ آ آئینی ءُ قانونی ھک ءَ دار اَنت کہ آھاں داتگیں عمر قید ءِ سزا ءِ اپیل ءَ بہ کن اَنت بلے آھانی اپیل ءِ گوشدارگ ھم اکتوبر ءَ داں دوریں روچے ءَ ٹھینگ بوتگ۔ آئی ءَ گوشت کہ چیف جسٹس کامران ملاخیل ءِ دور ءَ اے وڑیں برجاھیں تاخیر ایشانی اپیل ءِ بنیاتی ھک ءُُ ترندیں انصاف ءِ ھک ءَ را ھراب کنگ ءَ انت۔ وھدے کہ یک مردمے پیسر ءَ چہ زندان ءَ اِنت، آئی ءَ گْوشتگ کہ آھانی اپیل ءَ بے مھتلیں وھد ءَ مہتل کنگ ءَ چہ زندان ءَ وت ءَ سزا ءِ تہ ءَ بدل کنت۔
ڈاکٹر مہرنگ بلوچ ءَ گْوشتگ کہ چہ 13 جون ءَ بگر داں مرچیگیں روچ ءَ بی وائی سی ءَ ”بے دیمیں مقدمہ“ ءِ ھلاپ ءَ زھرشانی ءِ رد ءَ 20 گوشدارگ ءِ بائیکاٹ کتگ۔ آئی ءَ گْوشتگ کہ اے بابت ءَ بلوچستان ہائی کورٹ ءَ درخواست دائر کنگ بوتگ بلے درخواست ءِ گوشدارگ ءُ آھانی دفاع ءِ بنیاتی ھک ءِ رکھینگ ءِ بدل ءَ چیف جسٹس کامران ملاخیل ءِ چیر دستی ءَ آمید گس ءَ اے معاملہ ءَ دیر کنگ برجاہ داشتگ، یک انچیں دروشمے کہ آئی ءَ گْوشتگ کہ عدلیہ ءِ بے رھبندی ءِ بابت ءَ پدّریں جُست چست کنت۔
دزگیریں رہشون ءَ گشتگ کہ دومی نیمگ ءَ گوستگیں شش ماہ ءَ چہ آہانی ضمانت ءِ درخواستانی گوشدارگ ءِ بدل ءَ چیف جسٹس ملاکھل ءَ باز رند ءَ کیس چہ کاز لسٹ ءَ ڈی لسٹ کتگ۔ آئی ءَ گوشت کہ ضمانت ءِ معاملہ آناں مدام دیر کنگ ءِ وھد ءَ وت عدالتی عمل ءِ وسیلگ ءَ یک مردمے ءَ را سزا دیگ انصاف ءِ بنیاتی اصول آنی ھلاپ اِنت۔
آئی ءَ گوشت کہ بلوچستان ءِ چیف جسٹس ءَ را کیس ءِ یک فریق ءِ بستار ءَ کار کنگ ءِ بدل ءَ وتی آئینی کارگس ءِ لوٹ آنی رد ءَ غیر جانبدار ءُُ انصاف ءِ بنیاد ءَ پیسلہ کنگ لوٹ ایت۔ آئی ءَ گوشت کہ عدلیہ ءِ کرد ریاستی ادارگ آنی پیسلہ آناں قانونی پوشاک ءِ پھجارینگ نہ اِنت بلکیں شہری آنی بنیاتی ھک آنی رکھینگ، آھانی دفاع ءِ ھک ءُُ آھانی عدالت ءِ وھد ءِ سر ءَ دسترس ءِ رکھینگ اِنت۔
ڈاکٹر مہرنگ بلوچ ءَ گپ ءِ آسر ءَ اے لوٹ کتگ کہ پاکستان ءِ سپریم کورٹ ءُُ میان استمانی انسانی ھکانی گل بی وائی سی ءِ ھوالگ ءَ کیسانی تہ ءَ عدالت ءِ تعصب ، دفاع ءِ حق ءِ رد کنگ ءُُ انصاف ءِ رسگ ءِ تہ ءَ دیر کنگ ءِ زوتیں نوٹس ءَ بہ زور اَنت ءُُ یک شفاف ءُُ بے رھبندیں پٹ ءُُ پولے ءَ را دل یکیمی بہ کن اَنت۔
