امریکی نیوز ویب سائٹ ایکسیوس ءَ امریکی کارندہانی حوالہ ءَ رپورٹ داتگ کہ امریکی فوج ءَ ایران ءِ ھلاپ ءَ فوجی اُرشانی پدا بندات کنگ ءِ ھاترا تیار بوھگ ءِ گشگ بوتگ۔
پنتاگون ءَ امریکی فوج ءِ مرکزی کمانڈ ءَ گْوشتگ کہ ایران ءِ ھلاپ ءَ جنگی آپریشن پدا بندات کنگ ءَ ساڑی بہ بنت۔
ایکسیوس ءِ گشگ اِنت کہ امریکی صدر ڈونلڈ ٹرمپ ءَ اے بابت ءَ ھچ وڑیں ٹھینگیں پیسلہ نہ کتگ ءُ اے پرمان ءَ پچیں جنگ ءِ بوت کنوکیں پدا بندات کنگ ءِ روچ ھوار نہ بوتگ بلے اے بوت کنت کہ اکتوبر ءِ گڈسر ءَ اسرائیل ءِ گچینکاری ءَ پیسر بہ بیت۔
وسیلگاں ایکسیوس ءَ گوں تران کنان ءَ گْوشتگ: اگاں ھڑتال پدا بندات کنگ بہ بنت گڑا چہ آھاں ایٹمی، بنیاتی ڈھانچہ ءُ توانائی ءِ جاھاں نشانگ جوڑ کنگ ءِ گمان اِنت۔
وائٹ ہاؤس ءِ یک کارندہے ءَ گوں ایکسیوس ءَ گپ ءُ تران کنان ءَ دعویٰ کتگ کہ امریکہ تنگہ ہرمز، مکران کوسٹل ایریا ءِ دریا ءِ کنٹرول ءُ ایران ءِ معیشت ءِ ھلاس بوھگ ءِ سبب ءَ سکیں مھکمیں جاہ ءَ اِنت۔ “صدر ٹرمپ ءِ دست ءَ درستیں کارڈ اَنت ءُ آ ھما کار ءَ کنت کہ پہ امریکہ ءَ شرتر اِنت۔”
ایشی ءَ چہ پیسر امریکی انتظامیہ ءِ کارندہاں ھال داتگ کہ وائٹ ھاوس ءَ پنٹاگون ءَ چہ لوٹ کتگ کہ آ نومبر ءَ امریکی میان اُستمانی گچین کاری ءَ پیسر ارشانی پدا بندات کنگ ءِ منصوبگ جوڑ بہ کنت۔