سرمچار راج دوستاں جار جت کہ چہ محاصرہ ءِ ٹُکّگ ءَ پد آئی ءِ لھتے لشکر چہ سراوان ءِ دمگ بخشان ءِ ٹکر ءِ جاہ ءَ درکپتگ اَنت؛ ھمے وھد ءَ ائیر جی سی ءَ چار سلاہ بند ءُ وتی سئے کارندہانی بیرانی ءِ ھال داتگ ءُ ھمے رنگ ءَ تراکناکیں چیزانی درگیجگ ءِ ھال داتگ۔
ستمبر 2026 ءَ شمبے ءِ سہب ءَ بلوچستان ءِ سراوان ءِ دمگ بخشان ءَ سیکورٹی فورسز ءُ پاپولر فائٹرز فرنٹ ءِ باسکاں مزنیں درگیری یے بوتگ- اے درگیری ءِ رپورٹ ءِ رد ءَ نزیک ءَ 9 کلاک ءَ برجاہ بوتگ ءُ شہر ءِ جتا جتائیں دمگاں آماچ بوتگ۔
یک بیانے ءِ تہ ءَ پاپولر فائٹرز فرنٹ ءَ جار جتگ کہ سیکورٹی فورسز ءَ گروپ یونٹانی تہ ءَ یکے ءِ سر ءَ اُرش کتگ ءُ سپورٹ ٹیماں پہ محاصرہ ءِ ھلاس کنگ ءَ مداخلت کتگ۔ اے گل ءَ دعویٰ کتگ کہ اے جنگ ءَ را شہر ءِ سرجمیں دمگاں شنگ ءُ تالان کنگ ءَ چہ آ بنداتی محاصرہ ءِ لیکہ ءَ چہ ٹپّگ ءُ لھتیں محاصرہ کتگیں جنگولاں در کنگ ءَ سوبین بوتگ اَنت۔ فرنٹ ءَ آپریشن ءِ ھوالگ ءَ گیشیں ھال ءُ اھوال ءِ شنگ کنگ ءِ وعدہ ھم کتگ۔
دومی نیمگ ءَ ایر جی سی ءِ زمینی اُرد ءِ قدس ءِ بنجاہی کارگس ءَ اے مراگش ءَ را ”پیشہ واریں ناشرکاریں ٹیم ءِ ھلاپ ءَ آپریشن“ لیک اِتگ ءُ گْوشتگ کہ جاہ ءِ سر ءَ ھواریں مردماں سراوان ءَ کوش ءِ پلاٹ ءِ کنگ ءِ ارادہ کتگ۔ سپاه ءَ جار جتگ کہ اے کارروائی ءَ چار سلاہ بندیں مردم بیران بوتگ اَنت ءُ چہ اے جاہ ءَ مزنیں کساسے ءَ سلاہ، گولہ بارود ءُ تراکناکیں چیز برآمد کنگ بوتگ اَنت۔ اے فورس ءَ وتی سئے کارندہانی بیرانی ءِ ھال ھم داتگ ءُ اے گمان ھم دیم ءَ آؤرتگ کہ کُشگ بوتگیں سلاہ بندیں مردمانی کساس گیش بوت کنت۔
رند ءِ ھالانی رد ءَ ایرانی سرکاری رسانکدر ءَ بیران بوتگیں لشکری کارندہانی تہ ءَ دو ءِ پجار میساگ سانی ءُ مھدی سرھادی ءِ نام ءَ کتگ۔ بلے دمگی وسیلہ کہ گوں بلوچستان انسانی حقانی دستاویزات ءِ شبکہ ءَ ھمگرنچ اَنت، لشکری ٹپیانی کساس -کُشگ ءُ ٹپی – ”دزاں“ لیک اِتگ اَنت، اے کچ ءُ کساس گوں سرکاری ھساب ءَ ھلاپ اِنت۔ چہ ٹکر ءِ جاہ ءَ شنگ بوتگیں ویڈیوز ءَ ایمبولینس ءِ دمگ ءَ روان دیگ بوھگ ءَ گندگ بیت ءُ فوجی لشکر ءَ مزنیں ءُ نیم مزنیں سلاہ ءُ ھمے رنگ ءَ کواڈ کاپٹر ءِ کارمرز کنگ ءَ سلاہ بندیں مردمانی جاہ ءُ نشان ءِ شوھازگ ءَ گندگ بیت۔