مبینہ فورسز آپریشن ءِ وھد ءَ شہری آبادی ءِ نزیک ءَ ڈرون ءِ اُرش ءِ ھال داتگ
دمگی وسیلگ ءِ رد ءَ مند ءَ مزنیں کساسے ءَ سلاہ بندیں مردمانی ھست بوھگ ءُ جتا جتائیں نیمگاں سڑک بندش ءِ وھد ءَ پاکستانی لشکر ءَ ھاسیں رنگ ءَ ایف سی ءَ زمینی آپریشن ءِ بدل ءَ کواڈ کاپٹر ءِ وسیلگ ءَ گولہ باری ءِ سرا زور داتگ۔
دمگی مردمانی گشگ انت کہ اے فورسز ءَ آپریشن ءِ کنگ ءِ ھاترا دیم پہ دیم ءَ دمگ ءَ اتکگ ءُ ایشی ءِ بدل ءَ کواڈ کاپٹر ءِ کمک ءَ چہ دور ءَ بمبتراک کتگ کہ ایشی ءَ چہ شہری آبادی ھم تاوان رستگ۔
بنداتی ھالانی رد ءَ اے مبینہ کواڈ کاپٹر ءِ اُرش ءَ چہ لابیلا ءُ ملا چٹ ءِ کم چہ کم دو دمگی مردم ٹپیگ بوتگ اَنت ءُ پہ درمان کنگ ءَ سورو ءِ نادراھجاہ ءَ دیم دیگ بوتگ اَنت۔
دومی نیمگ ءَ دمگی وسیلگ ءِ رد ءَ سلاہ بندیں مردم وتی جاہ ءَ دارگ ءَ اَنت ءُ دمگ ءِ دمگی آبادی ءَ گوں گپ ءُ تران ھم برجاہ اِنت۔
دمگ ءِ جاور ھال نگیگ لیکگ بوھگ ءَ اَنت۔ ٹپیگ، مالی تاوان ءُ آپریشن ءِ گیشتریں ھال انگت ءَ دیم ءَ نہ اتکگ اَنت۔
اے ھال ءِ سر ءَ گیشتریں ھال ءُ اھوال ءِ رسگ ءَ پد اپ ڈیٹ کنگ بیت۔
#بلوچستان .
#آزاد بلوچستان .
#بلوچ نسل کُشی بند کن اِت
پنجگور ءَ چہ برآمد بوتگیں مردمانی تہا سئے لاش ءِ پجار کنگ بوتگ
بلوچستان ءِ ضلع پنجگور ءَ چہ پنچ مردمانی لاش برآمد کنگ بوتگ۔
بلوچستان ءِ ضلع پنجگور ءِ حالانی ردا پنجگور ءِ روڈ ءِ سرا گواڑگھو کراس ءِ نزیک ءَ پنچ ناشناسیں مردمانی لاش دست کپتگ۔ نیروی انتظامی آں پہ المی ئیں قانونی کارروائی ءُ شناسایی ءِ ھاتر ءَ بیمارستان تدریس ءَ دیم داتگ اَنت۔
بیمارستان ءِ وسیلگ ءِ رد ءَ لاشانی سر ءَ تیر ءِ ٹپ ءُ زوراکی ءِ نشان گندگ بوتگ اَنت۔ اولی رند ءَ سئے مردمانی پجار شفیق ءِ نام ءَ داد محمد ءِ چُک رائے نگور بوتگ؛ حبیب اللہ فرزند سلیم کٹا گاری؛ و صفی اللہ فرزند عبدالوہاب خدا آبادان ءِ نندوک انت۔
دگہ دوئیں لاشانی پجار انگت ءَ پدر نہ بوتگ۔
زانگ بہ بیت کہ گوستگیں روچ ءَ گوادر ءِ دمگ جمری ءَ چہ زوراکی ءِ آماچیں سئے مردمانی لاش ھم برآمد کنگ بوتگ کہ آھانی پجار پد ءَ آھانی سیاد ءُ وارساں کتگ۔ شناخت بوتگیں مردمانی تہا احسان حسن ہم ھوار ات کہ آ دمگی نامداریں سیاسی مردم واجہ محمد حسن ءِ زوراکی ءَ بیگواہ بوتگیں چُک ات۔
لوگ ءِ مردمانی گشگ ءِ رد ءَ احسان حسن اے سال ءِ 21 جنوری ءَ پاکستانی لشکر ءَ چہ وتی لوگ ءَ دستگیر کنگ ءَ پد بیگواہ کنگ بوتگ ات۔