لھتیں روچ پیسر بلوچستان ءِ سر وزیر اسپورٹس ءُ ورنای کارانی صلاحکار مینا مجید ءِ برات سلاھبنداں پہ زور آوار جتگ۔ اے رد ءَ مینا مجید ءَ مند ءُ کش ءُ گور ءِ دمگاں سرجمیں کچ ءُ کساس ءَ فوجی آپریشن بندات کنان ءَ وتی اثر ءُ رسوخ ءِ جھل ءُ بُرز کت۔
مئے زانتکاری ءِ رد ءَ لوگ پہ لوگ پٹ ءُ پول کنگ بوھگ ءَ اِنت ءُ ھما کہ آئی ءِ برات ءَ گوں جیڑھ بوتگ اَنت یا آئی ءَ زان اَنت یا کہ آھانی سر ءَ کمیں شک ھم کپ اِیت آ درست شپ ءِ شپ ءَ چہ لشکر ءَ زوراکی ءَ چست کنگ ءَ اَنت ءُ ھچ وڑیں قانونی کارروائی نہ کنگ ءَ اَنت۔ اے زُلم ءُ زوراکی بلوچ ءِ سر ءَ ھر وھد ءَ میلانک بوتگ ءُ اے رندی ھم “بہترین” دْروشم ءَ دیم ءَ برگ ءَ اِنت.
آ ہما جنین اِنت کہ یک وھدے ءَ پرائمری اسکول ءِ استاد بوتگ، آئی ءَ سیاست ءِ اے بی سی ہم نہ زانتگ، بلے فوج ءِ سرا آرام کنگ ءَ چہ آ چہ اودا دیم ءَ اتکگ۔ نوں گپ ایش اِنت کہ اصل زالم کئے اِنت؟ ھما کہ پہ ذاتی بدلہ ءِ ھاترا اقتدار ءَ ناجائز کارمرز کنت یا ھما کہ وتی پرمان ءِ سرا بے گناھیں مردماں آوار جنگ ءِ ھاترا وردی ءِ پُشت ءَ وتی دیم ءَ شُتگ؟ دوئیں یک پیم ءَ گناہ گار اَنت۔ ریاستی طاقت ءِ مول ءُ مراد وزیرانی ھاندان ءِ جیڑہانی گیش ءُ گیوار کنگ نہ اِنت۔ بلوچ راج پیسرا چہ زوراکی ءَ بیگواہ کنگ ءِ ٹپاں برداشت کنگ ءَ اِنت ءُ نوں پہ بااثریں ھاندان ءِ ھاترا گیشتر لوگانی ھلاس کنگ بے دروریں ناانصافی اِنت۔
مئے لوٹ ایش انت کہ چست بوتگیں درستیں مردم زوت آمید گس ءَ پیش کنگ بہ بنت، آپریشن ءِ سرا آزاتیں عدالتی پٹ ءُ پول کنگ بہ بیت ءُ براتانی آوار جنگ ءِ کیس ءَ را قانون ءِ رد ءَ دیم ءَ برگ بہ بیت۔ زلم ، ھرکس ءِ نام ءَ بہ بیت ما ایشی ءَ زلم گْوشیں ءُ ایشی ءِ ھلاپ ءَ توار چست کنگ ءَ برجاہ دار ایں ۔