انسانی حقانی گل ہالوش ءِ گشگ انت کہ ایران ءِ سراوان ءِ روٹک ءِ سیمسر ءِ نزیک ءَ مک سوختہ ءِ دمگ ءَ کم چہ کم 17 اوگان مہاجر چہ شدیدیں تُن ءَ بیران بوتگ انت کہ آہانی تہا جنین، مردین ءُ زہگ ھوار انت۔
ہالوش ءَ گشتگ کہ اے وئیل 10 ستمبر پنچ شمبے ءِ روچ ءَ بوتگ۔ تنظیم ءِ رد ءَ لاش پد ءَ چہ دمگ ءَ خاش ءِ مردگ جاہ ءَ دیم دیگ بوتگ اَنت۔
ہالوش ءِ نیمگ ءَ شنگ بوتگیں ویڈیوز ءَ بازیں مردمے ناشناسیں جاہ ءَ بازیں قبر ءِ کشگ ءَ گندگ بیت۔
رپورٹ ءِ رد ءَ بیران بوتگیں مردمانی تہ ءَ پنچ چہ اوگانستان ءِ باغلان ءِ صوبہ ءَ یک ھاندان ءِ مردم بوتگ اَنت۔
ایشانی تہ ءَ 45 سالی مات ءُ آئی ءِ چاریں جنک ھوار اَنت کہ آھانی اُمر 22، 18، 16 ءُ 14 سال اِنت۔اے ٹبر ءِ سیاد ءُ وارث سراوان ءَ نشتگ اَنت ءُ ایشانی جنازہ ءِ نماز یک شمبے ءِ روچ ءَ برجم دارگ ءِ گمان بوتگ۔
ہالوش ءَ گْوشتگ کہ دگہ بیران بوتگیں مردمانی تہ ءَ کم چہ کم 14 سال ءَ کمیں شش زھگ ھم ھوار اَنت۔
گواہ ءُ بیران بوتگیں مردمانی سیاد ءُ وارساں گْوشتگ کہ مہاجراں سفر ءِ وھد ءَ آپ ھلاس بوتگ ءُ چہ تُن ءَ بیران بوتگ اَنت ءُ لھتے یکے دومی ءِ نزیک ءَ بیران بوتگ اَنت۔
یک نزیکیں مردمے ءَ ھالوش ءَ را گْوشتگ کہ گوں اے گل ءَ سفر کنوکیں مردین چہ راہ ءِ سر ءَ جنین ءُ چُکاں جتا بوتگ اَنت ءُ پد ءَ جنین ءُ چُکاں آپ ءِ ھچ وڑیں آسراتی ءِ ھست نہ بوھگ ءَ دیم ءَ برتگ اَنت۔
منبع مقامی ءِ گشگ انت کہ لاشاں خاش ءَ دیم دیگ بوتگ انت پرچا کہ سراوان ءِ مردگ جاہ ءَ گنجائش ءِ کساس نہ بوتگ۔
اے وئیل ءَ چہ چار روچ ءَ پد ھم ھاندان ءِ مردم جھد کنگ ءَ اِت اَنت کہ بیران بوتگیں مردمانی دیم دیگ ءُ دفن کنگ ءِ بندوبست ءَ بہ کن اَنت۔
ہالوش ءَ اے گپ ءِ سر ءَ زور دات کہ آ وت ماں وت ءَ بیران بوتگیں مردمانی راستیں کساس یا اے وئیل ءِ سرجمیں ھالاں پٹ ءُ پول کنگ ءَ سوبین نہ بوتگ ءُ گْوشتگ کہ دگہ بیران بوتگیں مردمانی پجار ءُ بیران بوتگیں مردمانی جاور ھال ءِ بابت ءَ زانتکاری انگت پٹ ءُ پول کنگ بوھگ ءَ اِنت۔