اسلام آباد: پاکستان ءَ سیاسی مخالف، انسانی حقانی کارکن ءُُ اختلاف ءِ توار آنی ھلاپ ءَ ناشرکاری ءِ ھلاپ ءَ کانود آنی کارمرد کنگ ءِ سر ءَ سنگینیں جُست چست بوھگ ءَ اَنت۔ امریکہ ءِ پٹ ءُ پولی گل دی جیمز ٹاؤن فاؤنڈیشن ءِ نوکیں رپورٹ ءَ ھشدار داتگ کہ بلوچ انسانی ھکانی رھشون ڈاکٹر مھرنگ بلوچ ءَ را عمر قید ءِ سزا دیگ بوت کنت کہ پاکستان ءَ سیاسی اختلاف ءَ ناشرکاری ءِ نام دیگ ءِ گیش بوھوکیں رجحان ءِ نشانی بہ بیت۔
جیمز ٹاؤن فاؤنڈیشن ءِ جرنل ٹیررزم مانیٹر ءَ شنگ بوتگیں یک تجزیہ ءِ رد ءَ کوئٹہ ءِ انسداد ناشرکاری ءِ آمید گس ءَ 22 جون ءَ ڈاکٹر مہرنگ بلوچ ءَ را ناشرکاری ءُ کوش ءِ الزام ءَ عمر قید ءِ سزا داتگ بلے رپورٹ ءَ گشگ بوتگ کہ آمید گس ءَ آئی ءَ را ہچ وڑیں ثبوت پیش نہ کتگ کہ آئی ءَ را ڈائریکٹ ءِ جست ءُ پرس ءَ گوں ہمگرنچ کنت۔
رپورٹ ءِ تہ ءَ گْوشگ بوتگ کہ اے کیس جولائی 2024 ءَ گوادر ءَ بلوچ یکوئی کمیٹی ءِ زھرشانی ءِ وھد ءَ بوتگیں زوراکی ءِ وئیلاں گوں سیادی دار اِیت، اے زھرشانی ءِ وھد ءَ سیکورٹی کارندہ ءُ زھرشانی کنوکیں مردمانی نیام ءَ ٹکر ءُ ٹکر ءَ سئے مردم بیران بوتگ۔
زانتکار آندریا سرینو ءِ رد ءَ ڈاکٹر مھرنگ بلوچ ءِ سزا ءِ سبب ءَ پاکستانی سرکار ءُ بلوچ راج ءِ نیام ءَ پیسر ءَ چہ ھستیں بے باوری گیش بوت کنت۔
اے رپورٹ ءَ اے گپ پدر کنگ بوتگ کہ بلوچ یکوئی کمیٹی یک بے سلاہیں انسانی ھکانی جنبشے کہ آئی ءَ مدام بلوچستان ءَ زوراکی ءَ بیگواہ کنگ ، انسانی ھکانی لگتمالی ءِ گمان ءُ آماچیں ھاندانانی کمک ءِ ھاتر ءَ انصاف ءِ لوٹ کتگ۔
ڈاکٹر مھرنگ بلوچ ءِ سیاسی ءُ چاگردی جھد 2011 ءَ آئی ءِ پت غفار بلوچ لانگو ءِ زوراکی ءَ بیگواہ کنگ ءَ پد بندات بوتگ ءُ پد ءَ آئی ءَ نودربر ءِ ھک ، وانگ ءِ موہ ءُ بلوچستان ءَ زوراکی ءَ بیگواہ کنگ ءِ ھلاپ ءَ زھرشانی ءِ جنبشانی سروکی کتگ۔
جیمز ٹاؤن فاؤنڈیشن ءِ رپورٹ ءِ رد ءَ ڈاکٹر مھرنگ بلوچ، شاہجی سبغت اللہ بلوچ ءُ بلوچ یکوئی کمیٹی ءِ دگہ سروکاں انسداد ناشرکاری ءِ ایکٹ ءُ پاکستان ءِ سزا ءِ قانود ءِ جتا جتائیں شقانی رد ءَ سزا دیگ بوتگ، اگاں چہ کہ بلوچ یکوئی کمیٹی ءِ نام ءَ نیشنل’ پاکستان ءِ نام ءَ ھوار نہ بوتگ۔ واک.
رپورٹ ءَ ترس اِنت کہ اے کیس پاکستان ءِ انسداد ناشرکاری ءِ قانونی فریم ورک ءَ را پرامن سیاسی ءُ انسانی ھکانی تحریک آنی سرکوب کنگ ءِ ھاترا کارمرد کنگ ءِ نوکیں مثال ءِ جوڑ کنگ ءَ بوت کنت۔
تجزیہ ءِ تہا پیسریگیں مزن وزیر عمران خان ءِ پاکستان تحریک انصاف پارٹی ءِ سرا سرکچ ءِ ہم حوالہ داتگ۔ رپورٹ ءِ رد ءَ راولپنڈی ءِ انسداد ناشرکاری ءِ آمید گس ءَ ناشرکاری ءِ کیس آنی تہ ءَ پی ٹی آئی ءِ 47باسک آناں سزا داتگ ءُُ ایشی ءَ چہ سیاسی کار ءُُ کرد ءُُ ناشرکاری ءَ گوں سیادی داروکیں کانود آنی نیام ءَ فرق ءِ بابت ءَ گیش جُست چست بوتگ اَنت۔
رپورٹ ءِ تہ ءَ گوشگ بوتگ کہ عمران خان ءُ ڈاکٹر مھرنگ بلوچ ءِ دوئیں کیس پاکستان ءَ ناشرکاری ءِ ھلاپ ءَ کانود آنی بوت کنوکیں سیاسی نادراھی ءِ ھوالگ ءَ جیڈھ ءِ دیم ءَ آرگ ءَ اَنت۔
جیمز ٹاؤن فاؤنڈیشن ءِ رد ءَ ڈاکٹر مھرنگ بلوچ ءِ ھلاپ ءَ کارروائی بلوچستان ءَ پاکستان ءِ رھبند ءِ تہ ءَ یک موڑ ءِ نشانی بوت کنت کہ اودا نہ ایوک ءَ فوجی کارروائیانی وسیلگ ءَ بلکیں عدالتی ءُ کانودی کارانی وسیلگ ءَ ھم اختلاف ءِ توار سرکوب کنگ بوت کن اَنت۔
اے تجزیہ ءِ آسر ءَ اے گپ دیم ءَ کیت کہ اگاں سیاسی اختلاف، انسانی حقانی جہد ءُ ناشرکاری ءِ نیام ءَ قانونی سیمسر ءِ سرا ھچ وڑیں زانتکاری نیست گڑا اے پاکستان ءَ شہری آجوئی، سیاسی ھک ءُ جمہوری اختلاف ءِ دیم ءَ گیشتر چیلنج ءِ سوب جوڑ بوت کنت۔
#بلوچستان #پاکستان #مھرنگ بلوچ .
