شال (خاموش): کوئٹہ پریس کلب ءِ دپ ءَ وائس فار بلوچ مسنگ پرسن ءِ نیمگ ءَ برجم داشتگیں زھرشانی کیمپ 6394می روچ ءَ برجاہ بوتگ ءُ عبدالرحمن مری ءِ لوگ ءِ مردم ھم زھرشانی ءَ ھوار بوتگ اَنت ءُ آئی ءِ ھال ءُ اھوال ءُ آئی ءِ جان سلامتی ءِ ھال ءِ لوٹ کنگ ءَ اَنت۔
تنظیم ءِ نیمگ ءَ چہ شنگ بوتگیں بیان ءِ رد ءَ 13 جنوری 2015 ءَ ھزارگنجی ءِ نیو کاہان ءَ چہ مری زوراکی ءَ بیگواہ کنگ بوتگ۔
آئی ءِ لوگ ءِ مردماں گْوشتگ کہ آئی ءِ بیگواھی ءَ چہ یک دہائی ءَ گیش گوستگ بلے آ نہ آمیدگس ءَ پیش کنگ بوتگ ءُ نہ کہ واکداراں آئی ءِ جاہ ءُ نشان ءِ بابت ءَ سرپدی داتگ۔
آہاں گشتگ کہ دراجیں بے یقینی ءَ سرجمیں ھاندان ءَ سکیں پریشانی ءُ رنج ءُ گم ءِ آماچ کتگ۔ سیاداں چہ مزنیں واکداراں اپیل کتگ کہ ماری ءِ جان سلامتی ءَ دل یکیمی بہ کن اَنت ءُ آئی ءِ جاور ءُ جاہ ءِ بابت ءَ سرپد بہ کن اَنت۔
وی بی ایم پی ءِ چیئرمین نصر اللہ بلوچ ءَ بلوچستان ءَ مری ءُ اے دگہ درستیں زوراکیں بیگواھیں مردمانی پچ گرگ ءِ تنظیم ءِ لوٹ ءِ پدا زور پر دات۔
آئی ءَ گوشت کہ ریاست ءِ ذمہ واری اِنت کہ آ وتی بیگواھیں سیاد ءُُ وارس آنی بابت ءَ ھاندان آناں سرپد بہ کنت ءُُ اے گپ ءَ را دل یکیمی بہ کنت کہ ھرکس کہ بندیگ اِنت آ کانود ءِ رد ءَ آمید گس آنی دیم ءَ پیش کنگ بہ بیت۔
بلوچ ءَ زوراکی ءَ بیگواہ کنگ ءِ ھلاسی ءِ ھم لوٹ کتگ ءُ چہ واکداراں لوٹ کتگ کہ آ بیگواھیں مردمانی دراھیں کیساں آئین ءُ کانود ءِ رد ءَ گیش ءُ گیوار بہ کن اَنت۔
کوئٹہ پریس کلب ءِ دپ ءَ اے زھرشانی کیمپ وی بی ایم پی ءِ بلوچستان ءَ بیگواھیں مردمانی بابت ءَ پسو لوٹگ ءِ برجاھیں مہم ءِ بھر اِنت۔ بیگواھیں مردمانی کھولاں باز رند ءَ وتی نزیکیں مردمانی بابت ءَ زانتکاری ، احتساب ءُ آھانی کیسانی تہ ءَ قانونی کارروائی ءِ لوٹ کتگ۔
