سیکورٹی وسیلگ ءِ رد ءَ بلوچستان ءِ ضلع لسبیلہ ءَ پاکستانی سیکورٹی فورسز ءِ نشانگ جوڑ کنگ ءَ مزنیں اُرشے ءِ ھال شنگ بوتگ ءُ پاکستانی لشکر ءِ کاروان این 25 نیشنل ہائی وے ءِ سر ءَ اُرش ءِ آماچ بوھگ ءَ اِنت۔
وسیلگ ءِ رد ءَ اے اُرش ءَ پاکستانی لشکر ءِ 23 ءَ چہ گیش کارندہ بیران بوھگ ءِ ترس اِنت ءُ بازیں مردم ٹپیگ بوتگ اَنت۔ لسبیلہ ءِ کشاری دمگ ءَ فرنٹیئر فورس ءِ 15 ءِ نزیک ءَ گاڑی آنی سر ءَ ھواریں کاروان ءِ سر ءَ تراک ءِ پد ءَ اے مردم بیران بوتگ اَنت۔
ان پٹ ءِ رد ءَ اُرش ءَ پد سیکورٹی فورس ءِ گاڑی آنی تہ ءَ یکے ءَ را آتش زنی کنگ بوتگ۔ ٹپیگیں مردم بیلا کیمپ ءَ سر کنگ بوتگ اَنت ءُ اے وئیل ءَ پد این 25 شاہراہ بند کنگ بوتگ۔ پاکستانی سیکورٹی فورسز ءَ دمگ ءَ پٹ ءُ پول ءِ کار بندات کتگ ۔
اے اُرش ءِ سوب بلوچ لبریشن آرمی گشگ بوتگ کہ آئی ءَ گوستگیں ماھاں سرجمیں بلوچستان ءَ پاکستانی سیکورٹی فورسز ءُ سرکاری تنصیبات ءِ ھلاپ ءَ وتی سلاہ بندیں مہم ءَ مزنیں کساسے ءَ گیش کتگ۔