لندن: بلوچ راجی تحریک ءَ دوئیں ملکانی تہا نوکیں پارلیمانی کارروائی ءِ پد ءَ بلوچستان ءَ انسانی حقانی لگتمالی ءِ سر ءَ برطانیہ ءُ آئرش ءِ قانون سازانی برجاھیں حمایت ءِ وش آتک کتگ۔
میڈیا ءَ را شنگ کتگیں بیان ءِ تہ ءَ بی این ایم ءَ برطانیہ ءِ پارلیمنٹ ءِ باسک جان میک ڈونل ءِ منت گپتگ کہ آئی ءَ ارلی ڈے موشن پیش کتگ ءُُ سورب ءَ رپورٹ بوتگیں بالی اُرش، شہری ءِ بیرانی، سرجمیں بلوچستان ءَ کرفیو ءُُ مواصلات بند بوھگ ءِ ھوالگ ءَ دو نبشتھی پارلیمانی جُست پیش کتگ۔
بی این ایم ءِ رد ءَ برطانیہ ءِ سرکار ءَ اے گپ ءِ پدر کنگ ءَ پسو داتگ کہ آ اے ھالاں سرپد اِنت ءُ برطانوی ہائی کمیشن بلوچستان ءَ انسانی ھکانی جاور ھال ءَ گوں پاکستانی کارندہاں بُرزیں تک ءَ چست کنگ ءَ اِنت۔
بی این ایم ءَ اے منگ ءَ را ”مھم“ لیک اِتگ بلے گْوشتگ کہ نوں ایشی ءِ پد ءَ ٹھوس کارروائی کنگ بہ بیت۔ اے گل ءَ برطانیہ ءِ سرکار ءَ چہ لوٹ کتگ کہ آ رپورٹ بوتگیں بالی اُرشانی بابت ءَ یک آزاتیں میان اُستمانی پٹ ءُ پولے ءِ حمایت ءَ بہ کنت، بلوچستان ءَ ”جنگی جرم“ ءِ پاکستان ءَ احتساب بہ کنت ءُ کمک، فنڈنگ ءُ فوجی سامان ءِ ٹرانسفر ءَ را ھلاس بہ کنت کہ آئی ءِ گشگ اِنت کہ بلوچ آبادی ءِ ھلاپ ءَ گیشتر زوراکی ءِ وسیلہ بوت کنت۔ بی این ایم ءَ وتی ارادہ ءِ پدا زور دات کہ آ میان استمانی دیواناں بلوچ راجی جنز ءِ وکالت ءَ برجاہ بہ دار ایت ءُ پاکستان ءِ انسانی حقانی لگتمالی ءَ را جھان ءِ تک ءَ چست بہ کنت۔
الگ ءَ بی این ایم ءَ گوشت کہ سورب ءِ بالی اُرش ءَ پد آئی ءِ میاں اوستمانی رسائی ءَ آئرش ءِ قانون ساز آنی نیمگ ءَ چہ گیشیں پسو رستگ۔ اے گپ ءِ تہ ءَ گْوشگ بیتگ کہ آئرش ءِ پارلیمنٹ (Dáil Éireann) ءِ باسک روتھ کوپنگر ءَ بلوچستان ءِ اُرش ءُ لس مردمانی بیرانی ءِ جیڑہ دیم پہ آئرلینڈ ءِ درئی کار ءُ بیپار ءِ وزیر ءَ دیم ءَ آؤرتگ اَنت۔
وتی پسو ءِ تہ ءَ دری کارانی وزیر ہیلن میک اینٹی ءَ اے گپ ءِ پدرائی کتگ کہ آئرلینڈ اسلام آباد ءَ وتی سفارت خانہ ءِ وسیلگ ءَ بلوچستان ءِ دیمروئی آنی سر ءَ نگرانی کنگ ءَ اِنت، یورپی یونین ءِ ڈل ءُُ دگہ میاں اوستمانی شریکاں گوں رابطہ کنگ ءَ اِنت ءُُ انسانی ھک آنی جیڈھ آناں پاکستانی کارندہ آنی گوما براہ راست چست کنگ ءَ اِنت۔ بی این ایم ءَ گوشت کہ وزیر ءَ اے گپ ءِ ھم پدر کتگ کہ پاکستان ءِ نیمگ ءَ چہ انسانی ھک آنی میاں اوستمانی کنونشن آنی سر ءَ عمل کنگ یورپی یونین ءِ اسلام آباد ءِ گوما جی ایس پی + تجارتی سیادی ءِ تہ ءَ مرکزی بستار ءَ دار ایت۔
بی این ایم ءَ کوپنگر ءِ منت گپت کہ آئی ءَ آئرش پارلیمنٹ ءَ اے جیڑھ چست کتگ ءُ اے دیمروئی ءَ را اے گپ ءِ ثبوت لیک اِتگ کہ ”پائیداریں میان اُستمانی سفارتکاری“ بلوچستان ءَ پاکستان ءِ کاراں سرکار، پارلیمنٹ ءُ میان اُستمانی ادارگانی دیم ءَ ایر کنگ ءَ اِنت۔
تنظیم ءَ گشتگ کہ پاکستان بلوچستان ءَ رسائی ءَ را بندش جنگ ءِ جہد ءَ کنت بلے اودا جاورحالانی سرا گیش بوؤکیں میاں اوستمانی پٹ ءُ پول ءَ را رکینت نہ کنت۔
