زاهدان ءِ دمگ منزل عب ءَ لشکری لشکر ءُ سلاہ بندیں مردمانی نیام ءَ بوتگیں ٹکر ءِ پد ءَ یک رہائشی لوگے ءِ مزنیں کچے ءَ تباہی ءِ درشان کنوکیں ویڈیوز۔
بلوچ رسانکدر ءَ رستگیں ھالانی رد ءَ زاھدان ءِ دمگ منزل عب ءَ لشکری لشکر ءُ سلاہ بندیں مردمانی میان ءَ سلاہ بندیں جنگ ءُ چوپے نزیک ءَ چار کلاک ءَ پد آسر بوتگ۔ اے دیم پہ دیم بوھگ ءِ بندات شپ ءِ شش ءِ نزیک ءَ بوتگ ات۔
زاهدان ءِ رپورٹانی رد ءَ درجناں سیکورٹی ءُُ لشکری کارندہ چہ لشکری ءُُ نجی گاڑیاں چہ درگیجگ ءِ جاہ ءِ کش ءُُ گور ءَ دیم ءَ اتکگ انت۔ فوجی فورسز ءَ نشانگ جوڑ بوتگیں جاہ ءِ کش ءُ گور ءُ ہمے رنگ ءَ ہمساہگیں ماڑیانی بام ءِ سرا پوزیشن زرتگ۔
دیم پہ دیم ءِ وھد ءَ شدیدیں تیرگواری ءِ توار ءُ نیم بھاری ءُ بھاری سلاہانی شنگ کنگ ءِ توار -چہ آر پی جی ءُ مارٹر ءَ ھوار – بازیں کلاکاں دمگ ءَ گوشدارگ بوتگ اَنت؛ دھماکہ ءِ زور نزیکیں لوگانی دریگاں چہ ٹُکّر ٹُکّر کنگ ءَ بس اَت۔
دمگی وسیلگاں ھال داتگ کہ لشکری لشکر ءَ ھلکی ءُ نیم بھاری سلاہ، آر پی جی ءُ توپ خانہ ءِ کمک ءَ ھما لوگ ءَ نشانگ جوڑ کتگ کہ اودا سلاہ بندیں مردم جاہ منند بوتگ اَنت۔
بلوچ رسانکدر ءَ دیم داتگیں ویڈیو آباد گاہ ءِ مزنیں تباہی ءُ بربادی ءِ زاھر کن اَنت۔ فوٹیج ءَ چہ ماڑی ءِ جتا جتائیں دمگاں سک باز تاوان گندگ بیت کہ دروازگ ءُُ دیوالانی سرا بے کساس گولی ءِ ٹکر گندگ بنت۔ ایشی ءَ ابید اُرشانی وھد ءَ صحن ءَ اوشتاتگیں مسافر گاڑی ھم تباہ کنگ بوتگ۔
اے درگت ءَ سرکاری رسانکدر ءَ ار جی سی ءِ زمینی اُرد ءِ قدس ءِ بنجاھی کارگس ءِ پبلک ریلیشنز ءِ کارگس ءِ رد ءَ جار جتگ کہ ار جی سی ءُ کانود ءِ نفاذ ءِ کمانڈ (فراجہ) ءِ نیمگ ءَ چہ ”مشترکہ آپریشنل ایکشن“ ءِ وھد ءَ شش سلاہ بندیں مردم بیران بوتگ اَنت۔
کُشگ بوتگیں مردمانی پجار ءُ وابستگی انگت ءَ آزاتیں رنگے ءَ پٹ ءُ پول نہ بوتگ اَنت؛ وھدے کہ دمگی وسیلگاں چہ ٹکر ءِ دوئیں نیمگاں تاوان ءِ ھال داتگ بلے انوگ ءَ بیران بوتگیں مردمانی کساس ءُ پجار ءِ بابت ءَ ھچ وڑیں ھال ءُ اھوال دست نہ کپتگ۔
بلوچ میڈیا بیران بوتگیں مردمانی پجار ءُ اے ٹکر ءِ آسر ءَ بوتگیں تاوانانی بابت ءَ گیشتریں ھال ءُ اھوالانی جم کنگ ءِ ھاترا کار کنگ ءَ اِنت۔