بلوچستان ءِ ضلع کیچ ءَ جتا جتائیں وئیلانی تہ ءَ دو ڈرائیوراں ھوار شش مردم پہ زور بیگواہ کنگ بیتگ اَنت۔
ھالانی رد ءَ مھراج ءِ چُک 33 سالی اسد 21 اکتوبر 2026 ءِ شپ ءَ پاکستانی لشکر ءِ کارندہاں چہ وتی لوگ ءَ نوکین کوہان ، مند ءَ دزگیر کتگ ، اسد ڈرائیور ءِ بستار ءَ کار کنت ، ءُ چہ دزگیر کنگ ءَ پد آئی ءِ جاہ ءُ نشان زانگ نہ بوتگ ۔
یک جتاھیں وئیلے ءِ تہ ءَ فرنٹیئر کور ءِ کارندہاں 19 اکتوبر ءَ سھب ءِ سئے بج ءَ گوارکوپ ءِ سری کلاگ ءَ 41 سالی گل محمد ءِ چُک چہ وتی لوگ ءَ دزگیر کتگ۔افضال ھم ڈرائیور ءِ بستار ءَ کار کنت ءُ آئی ءِ جاہ ءُ نشان ءِ بابت ءَ ھچ وڑیں ھال ءُ اھوال دیم ءَ نہ اتکگ۔
دومی نیمگ ءَ دمگی وسیلگاں گْوشتگ کہ پاکستانی لشکر ءَ مند ءِ گوبرد ءِ دمگ ءَ بازیں لوگانی سر ءَ شپ ءِ سر ءَ اُرش کنگ ءِ وھد ءَ چار ورنا دزگیر کتگ ءُ ناشناسیں جاھے ءَ دیم داتگ اَنت۔
وسیلگ ءَ گْوشتگ کہ کارندہاں سھب ءِ دو بج ءَ شکری پیر محمد ءِ لوگ ءَ اُرش کتگ ءُ جنین ءُ چُکاں زھر ءُ زھر کتگ ءُ لوگ ءِ پٹ ءُ پول کتگ۔ وسیلگ ءَ گیش کرتگ کہ آیاں یک ورناھے برتگ کہ آئی ءِ پجار سمیر ناصر اِنت۔
پدا کارندہ دگہ لوگے ءَ داخل بوتگ انت، اودا آہاں مبینہ نقد ءُ دگہ سامان زرتگ ءُ ستار ءِ زھگ وسیم ءَ دزگیر کتگ۔
وسیلگ ءِ رد ءَ ایشی ءَ پد فورسز ءَ ساول محمد ءِ لوگ ءَ اُرش کتگ کہ اودا جنین ءُ چُک ھم آزار ءُ اذیت کنگ بوتگ اَنت۔ آئی ءِ دو چُک صغیر ءُ زہیر ءِ دست ءَ گرگ بوتگ اَنت۔
چاریں ورناہانی جاہ ءُ نشان زانگ نہ بوتگ۔
آزار ءُ سامان ءِ ضبط کنگ ءِ الزام ءِ پد ءَ . ہمے وڑیں شکایت نوشکی ءَ کہ اودا مہلوک ءَ انوگیں وھد ءَ ایف سی ءِ کارندہانی سر ءَ الزام جتگ کہ آیاں گوں بندیگ کنگ ءِ وھد ءَ بدیں ھال ءُ اھوال کتگ ءُ نقد زرّ ءِ پدا نہ داتگ۔
مہلوک ءَ گشتگ کہ چہ کلی فقیران ءَ بازیں مردم دزگیر کنگ بوتگ ءُ جست ءُ پرس ءَ پد یلہ کنگ بوتگ انت۔ ایشانی فون ءُ کیسگ پدا داتگ اَنت بلے زر گار بوتگ اَنت، ایشانی الزام اِنت۔ وھدے کہ آیاں اے لوٹ کت گڑا مبینہ ءِ رد ءَ کارندہاں آیاں گْوشتگ: ”زرّ ءِ جیڑھ ءَ ھُدا ءِ دست ءَ بہ دئے اِت۔“