نمدی ڈاکٹر ماہ رنگ بلوچ چہ زندان ءَ وتی خاندان ءَ

نمدی ڈاکٹر ماہ رنگ بلوچ چہ زندان ءَ وتی خاندان ءَ

منی گرانیں بانُک ءُ منی یکیں برات، ناصر جان،

من چہ ھما چیلنجاں سرپد آں کہ من شمئے سر ءَ آؤرتگ اَنت ءُ من شمئے درستاں چوں کسانیں اُمر ءَ پدا یک گرانیں وھدے ءِ تہ ءَ داتگ۔ ۲۰۱۱ ءَ بگر داں گرانیں وھداں مارا دوچار کپتگ بلے مرچی بلوچ ءِ ھمک لوگ ءِ کِسہ اِنت۔ ہرکذیں کہ تئو کمزور لیکئے، وثی کش و گوراں بچار۔

من زاناں من شمئے درستانی ذمہ واری ءِ وزن ءَ زرتگ ءُ اے اُمیت ءَ کہ اے بار شمئے شانک ءِ سرا ہچبر مہ کپیت۔ بلے بلوچستان ءَ نندگ ءَ چوش بوت کنت ءُ چہ ایشی ءَ بدتر بوت کنت۔ ذہنی لحاظ ءَ پہ ایشی ءَ تیار بہ بئے۔

زندان ءِ اولی دیوان ءِ وھد ءَ من اولی رند ءَ وت ءَ تئی تہ ءَ دیست۔ ہمے بے تاھیری، ہمے بے تاھیری، ھما بے وسی ءِ جھد کہ چیزاں پدا راست بہ کنت۔ ھون ءِ بندگ ءِ بزانت ھمے اِنت۔ بلے ما چے کُت کنیں؟ اے گپ ھم مئے ھساب ءَ نبشتہ اِنت۔ اے ہر بلوچ ءِ آکبت اِنت۔

من اے نمدی ءَ چہ وتی زندان ءِ کوٹی ءَ نبشتہ کنگ ءَ آں پرچا کہ چیزے است کہ من زندان ءَ ھما وھد ءَ کہ ما گند ءُ نند کتگ ات آھانی درشان ءَ نہ کتگ ات۔ اے زند پہ من نوکیں تجربگے ءُ من انگت چہ زندان ءِ کوٹی ءَ وتی برات ءُ گہاراں گوں گپ جنگ ءِ فن ءَ نہ زانتگ۔ من ترا ہمت دیگ لوٹ اِت بلے من ءَ گالانی کمی ات۔ نوں، من ہمے ہمت ءَ رسگ ءَ آں، ءُ تو ہم ہمے ہمت ءَ رسگ ءَ ئے، وہدے کہ وھد گوزگ ءَ اِنت۔ یات اِنت کہ مئے پت ءِ شھید بوھگ ءِ وھد ءَ ما درستاں چوں ھمت رستگ اَت؟

منی واھگ بوتگ اَت کہ یتیم ءِ بستار ءَ مزن بوھگ ءِ باوجود تئی زند چہ امن ءُ ایمنی ءَ پُر بہ بیت۔ من امیت کتگ ات کہ تو پدا پولیس ءِ ارشانی دیمپان ءُ زندان ءِ تر ءُ تاب ءَ نہ کن ئے۔ بلے ما چے کُت کنیں؟ اے آزمائش مزاحمت ءِ تہا زندگ بوتگیں زند ءِ سخت ترین حقیقت انت۔ ما بلوچستان ءَ وتی لوٹ ءُ تب ءَ وتی زند ءَ سکّینت نہ کن ایں ۔ اے گران تر بیث کنت بلے اے کدی آسان نہ ایں

مئے پت ءَ مئے واستہ فیصلہ ھما وھد ءَ کت کہ آئی ءَ وتی جند پہ بلوچ ھکانی واستا ندر کُت۔ ءُ آئی ءَ پد ما درستاں آئی ءِ فلسفہ وتی سرا زرت ءُ وت ءَ را اے جہد ءِ سرا پابند کت۔ نوں اے گرانیں وھداں شما یکے دومی ءِ ھیال ءَ بہ دار اِت ءُ یکے دومی ءِ ھمراہ بہ بئے۔

کدی مہ شموش اِت: راستیں زور ایوک ءَ جسمانی نہ اِنت؛ اے ذہنی ءُ نظریاتی اِنت۔ ذہنی ءُ نظریاتی لحاظ ءَ وت ءَ مھکم بکن اِت۔ یکے دومی ءِ حمایت ءَ بہ کن اِت۔ کدی وت ءَ ٹُکّگ ءِ اجازت مہ دئے اِت۔ ءُ مدام یات بہ دار کہ تئی ناکو نزور نہ اِنت۔ کمزوری چیزے نہ اِنت کہ مارا وراثت ءَ رستگ۔

اے وھد اِنت کہ تو مھکم بہ بئے، وتی پابند بہ بئے، ءُ وتی بلوچ برات ءُ گھارانی ھمراھی ءَ بہ اوشت۔

اللہ شمئے دراہیں حفاظت ءَ بہ کنت۔ اللہ بلوچستان ءَ وتی حفاظت ءَ بات۔ من اے نمدی ءِ نبشتہ کنگ ءِ وھد ءَ ائید ءِ راستیں روچ ءَ نہ زاناں بلے من ترا ءُ وتی راج ءَ زوتیں ائید مبارک ءِ واھگ داراں.

نیکیں واھگاں،

ماہ رنگ بلوچ .

چہ منی زندان ءِ کوٹی ءَ نبشتہ کتگ .

پنچ شمبے 27 مارچ