بلوچ اسٹوڈنٹس ایکشن کمیٹی لسبیلہ یونیورسٹی ءِ وائس چانسلر ءِ اگدہ ءَ اسکنڈل ءَ ہواریں فرد ءِ جوڑ کنگ ءَ را ایراد گپت

بلوچ اسٹوڈنٹس ایکشن کمیٹی لسبیلہ یونیورسٹی ءِ وائس چانسلر ءِ اگدہ ءَ اسکنڈل ءَ ہواریں فرد ءِ جوڑ کنگ ءَ را ایراد گپت
بلوچ اسٹوڈنٹس ایکشن کمیٹی ءَ لسبیلہ یونیورسٹی ءِ وائس چانسلر اگدہ ءَ جوڑ کنگ ءِ تُرندی ءَ ایر جتگ ملک ترین کہ پیسر ءَ یونیورسٹی آف بلوچستان اسکینڈل ءِ تہ ءَ ھوار بوتگ ۔ بی ایس اے سی ءَ اے پیسلہ ءَ را ”انصاف ءِ تراوسٹی“ لیک اِتگ ءُ اے پیسلہ ءَ بلوچستان ءِ وانگ ءُ زانگ ءِ نظام ءِ سر ءَ دیم پہ دیمیں اُرش لیک اِتگ۔

ملک ترین کہ بلوچستان یونیورسٹی ءَ مزنیں اسکینڈلے ءِ تہا ہوار بوتگ ات اولی رند ءَ مکران یونیورسٹی ءِ وائس چانسلر جوڑ کنگ بوت۔ آئی ءِ انوگیں لسبیلہ یونیورسٹی ءَ گچین کنگ ءَ چہ دمگ ءِ وانگ ءُ زانگ ءِ جاور ھال ءِ سر ءَ مزنیں جیڑہے دیم ءَ اتکگ۔ بی ایس اے سی ءَ یک انچیں مردمے ءِ گچین کنگ ءِ سر ءَ ایراد گپتگ کہ آئی ءَ وتی بیان ءِ رد ءَ بلوچ ءُ پشتون ءِ دود ءُ ربیدگ ءِ سرا زھر شانی کتگ ءُ غیر اخلاقی کارانی تہ ءَ ھمدست بوتگ۔

بی ایس اے سی ءِ جارکش ءَ گشتگ کہ یونیورسٹی ءِ سروک آنی بنجاہی کرد ایش انت کہ آ نودربراں فکری ءُُ خلاقی ماحول ءِ تہا رھشونی بہ کن انت۔ ’’بلے ترین ءِ سروکی ءَ لسبیلہ یونیورسٹی ءِ علمی ماحول ءَ کمی اتکگ۔ یکے چہ نودربراں زوراکی ءَ بیگواہ کنگ بوتگ ءُ اساتذہ ءُ نودربراں ترس ءُ بیم ءِ آماچ کنگ بوتگ۔”

بی ایس اے سی ءَ اے پیسلہ ءِ گیشتریں مول ءُ مراد ءِ نیمگ ءَ ھم دلگوش گور کتگ ءُ اے پیسلہ ءَ را بلوچستان ءَ دیم ءَ برگ بوھوکیں یک منظم ءُ زانتکاریں انسداد وانگ ءُ زانگ ءِ ایجنڈا ءَ گوں ھمگرنچ کتگ۔ ترجمان ءَ بولان میڈیکل کالج ءُ بلوچستان یونیورسٹی ءِ ہاسٹل آنی سر ءَ پولیس ءِ سرکوب ءِ وڑیں گوستگیں وئیل آنی سر ءَ چمشانک داتگ کہ آ مشکوکیں دروشم ءَ بند کنگ بوتگ اَنت۔

بیان ءِ تہ ءَ گیش گْوشگ بیتگ: ”اے کارروائی بلوچ ورناھانی وانگ ءُ زانگ ءِ رسگ ءِ راہ ءَ بند کنگ ءُ آیانی فکری دیمروئی ءِ دیم ءَ دارگ ءِ مزنیں کوشست ءِ بھر اَنت۔ “مالک ترین ءِ گچین کنگ ھمے تاوان باریں پندلانی رد ءَ اِنت ءُ لسبیلہ یونیورسٹی ءَ را علمی دیمروئی ءِ جاہ ءِ بدل ءَ ، فوجی وڑیں چاگردے ءَ بدل کتگ۔”

بی ایس اے سی ءَ بیھار داتگ کہ اے کارروائی نہ ایوک ءَ بلوچ نودربرانی اکیڈمک کیرئیر ءَ تاوان بار کنگ ءَ اَنت بلکیں سرجمیں دمگ ءِ فکری دیمروئی ءَ ھم ھترہ ءِ آماچ کنگ ءَ اَنت۔ کمیٹی ءَ چہ سرجمیں بلوچ ورنایاں لوٹ کتگ کہ آ وتی وانگ ءُ زانگ ءِ ھکانی پھازگ ءَ یک مشت ءُ تپاک بہ بنت ءُ اے وانگ ءُ زانگ ءِ ھلاپیں پالیسیاں چیلنج بہ کن اَنت۔

گڈی گپ ءِ تہ ءَ بی ایس اے سی ءَ اے گپ پدر کت کہ اگاں لسبیلہ یونیورسٹی ءِ انتظامیہ وتی تاوان باریں رویہ ءَ را بند مہ کنت گڈا آ مھکمیں گامگیج زوریت۔ “ما چہ سرکار ءُ واکداراں دزبندی کن ایں کہ آ اے گپ ءَ بہ من اَنت کہ لسبیلہ یونیورسٹی بلوچستان ءِ درستیں وانگ ءُ زانگ ءِ ادارگانی وڑ ءَ مئے راجی سرمایہ اِنت۔ وائس چانسلر ءُُ کارندہ یک اکیڈمک ماحول ءِ دیمروئی ءِ ھاترا کارمرز کنگ بنت نہ کہ آئی ءِ ھلاس کنگ ءِ ھاترا۔ اگاں اے وڑ برجاہ بہ بیت گڑا ما وتی وانگ ءُ زانگ ءِ ادارگ آنی رکھینگ ءِ ھاترا فیصلہ کنوکیں گامگیج زورگ ءَ تیار ایں ، ” بی ایس اے سی ءَ گپ ءِ آسر ءَ گْوشتگ ۔