بلوچستان ءِ شھر زهری ءِ سر ءَ بلوچ جدائی طلب کنٹرول کنگ ءَ انت ۔

بلوچستان ءِ شھر زهری ءِ سر ءَ بلوچ جدائی طلب کنٹرول کنگ ءَ انت ۔

حالانی ردا پاکستان بلوچستان ءِ ضلع خضدار ءِ شھر زہری ءَ بازار ءِ سرا جنگولاں اُرش کتگ۔ بلوچ لبریشن آرمی ءَ وتی بیان ءَ اے اُرش ءِ ذمہ واری زرتگ ءُ اے گپ ءِ سر ءَ زور داتگ کہ آئی ءِ سرمچاراں اے شھر ءِ سر ءَ سرجمیں قبضہ کتگ۔

بیان ءِ رد ءَ شھر ءِ سرجمیں سرکاری کارگس دست کپتگ اَنت ءُ اُرش ءِ وھد ءَ پولیس ءِ بنجاہی کارگس ءَ آتش زنی کنگ بوتگ۔

بلوچ لبریشن آرمی ءِ جارکش جیاند بلوچ ءَ دعویٰ کتگ کہ نوں زہری ءِ سر ءَ اے گل ءِ سرمچاراں سرجمیں کنٹرول کتگ۔

جنگولانی تھانہ ءُ دگہ سرکاری ماڑیانی سرا قبضہ کنگ ءِ وھد ءَ سرجمیں دمگ ءَ تراک ءُ تیرگواری ءِ توار بوتگ۔

پاکستانی کارندہاں انگت ءَ اے ھال ءِ سرکاری رنگ ءَ پدر نہ کتگ۔

پیسریگیں ھالانی رد ءَ کم چہ کم 60 جنگولاں شھر ءِ میان ءَ اُرش کتگ۔ رپورٹ ءِ رد ءَ ارش کنوکاں بانک ءِ لٹ ءُ کُٹ کتگ ءُ پولیس اسٹیشن ءَ آتش زنی کتگ ءُ اطلاعات ءِ کارگس ءَ آتش کتگ۔

بلوچ لبریشن آرمی کہ بلوچستان ءِ آجوئی ءِ ھاترا پاکستان ءَ جنگ ءَ اِنت، وفاقی حکومت ءِ سر ءَ دمگ ءِ طبیعی وسیلگاں چہ “زلم ءُ زوراکی” ءَ کارمرز کنگ ءِ الزام ءَ جنت۔ اے گل ءَ گوستگیں ماھاں پاکستان ءِ سیکورٹی فورسز ءِ سر ءَ ءُ ھمے رنگ ءَ چین ءِ کارمند ءُ کمپنیانی سر ءَ ھم کشندہ اُرش کتگ کہ آ دمگ ءَ کار کنگ ءَ اَنت۔

بلوچستان ءِ تہ ءَ گیش بوھوکیں زوراکی پاکستانی ریاست ءُ دمگ ءِ تہ ءَ جدائی طلبیں جنبشانی نیام ءَ برجاھیں جیڑھ ءِ پدر کنگ ءَ اِنت۔ بی ایل اے ءِ آجوئی ءِ جنگ ءَ برجاہ دارگ ءَ اے اُرش دمگ ءَ گیشتر بے رھبند کن اَنت ءُ ایمنی ءِ جاوراں گیش ءُ گیوار کن اَنت ءُ بنجاہی حکومت ءِ تہ ءَ زھرشانی کن اَنت۔

بلوچستان ءِ تہ ءَ گیش بوھوکیں جیڑھانی سر ءَ میان اُستمانی براتی ءَ را دلگوش دیگی اِنت کہ اودا نسلی ءُ سیاسی زھرشانی زوراکیں دیم پہ دیم بوھگ ءِ سبب جوڑ بوھگ ءَ اَنت۔ اگاں زوراکی برجاہ بہ بیت گڑا اے دمگ ءَ گیشتر بے رھبندی ءِ آماچ بوت کنت کہ ایشی ءِ آسر پاکستان ءُُ جنوبی ایشیائی ءِ گیشتریں سیکورٹی چاگرد ءِ ھاترا سک باز بنت۔