بلوچستان: تربت ءَ واحد کمبر ءِ یلہ کنگ ءِ واستہ جلسہ برجم دارگ بوتگ

تربت ءِ جلسہ ءَ شہری ءُ بیگواھیں مردمانی سیاد ءُ وارسانی مزنیں کساسے ءَ بہر زرتگ ءُ بیگواھیں مردمانی پجارینگ ءِ لوٹ کرتگ۔

بلوچستان ءِ ضلع کیچ ءِ مستریں شہر تربت ءَ مرچی یک زھرشانی جلسہ یے برجم دارگ بوتگ کہ ایشی ءِ تہا مزنیں کساسے ءَ زالبول، زھگ ءُ ورناہاں بھر زرتگ۔ جلسہ ءِ مول ءُ مراد ایش ات کہ بلوچ ءِ مزنیں آجوئی لوٹوکیں استاد واحد کمبر بلوچ ءِ سیاد ءُ وارسانی زھرشانی ءِ ریکارڈ کنگ بہ بیت کہ آئی ءِ ھلاپ ءَ آمیدگس ءَ نہ رکینگ بوتگ ءُ آمیدگس ءَ پیش نہ بوتگ ءُ منصفانہ مقدمہ ءِ ھچ وڑیں ھال ءُ اھوال نہ بوتگ۔

اے جلسہ ءَ تربت ءِ دمگی شہری، بیگواہیں مردمانی سیاد ءُ وارس، واحد کمبر ءِ کھول ءُ سیاسی گلانی سروک ءُ کارکناں بہر زرتگ۔ شریکاں واحد کمبر ءُ دگہ بیگواھیں مردمانی اکس دست ءَ داشتگ ءُ زوراکی ءَ بیگواہ کنگ ءِ ھلاپ ءَ نعرہ چست کتگ۔

بلوچ آجوئی ءِ جھد ءِ تہ ءَ یک سرگرم ءُ شرپداریں مردمے ءِ بستار ءَ زانگ بیتگیں واحد کمبر 19 جولائی ءَ چہ ایران ءِ شھر کرمان ءَ آوار جنگ بیتگ ءُ آئی ءِ کھول ءُ بلوچ آجوئی لوٹوکیں مردمانی الزام اِنت کہ آ پاکستانی ایجنٹانی دست ءَ آوار جنگ بوتگ ءُ پاکستان ءَ ٹرانسفر کنگ بوتگ ءُ انوں پاکستانی لشکر ءِ نگہبانی ءَ چہ دیم ءَ اتکگ۔

تربت جلسہ ءَ واحد کمبر ءِ جنک محلب کمبر بلوچ ءَ تران کنان ءَ گشت کہ منی پت بلوچ سیاسی جنز ءِ بہرے بوتگ ءُ مدام بلوچ حقانی سرا گپ جتگ۔ پاکستان ءَ آوار جنگ ءُ ناجائزیں وڑے ءَ زندان ءَ بند کتگ‘‘۔

آئی ءَ گْوشتگ: ما لوٹ کن ایں کہ آ انصاف ءِ دیم ءَ آرگ بہ بیت ءُ منصفانہ مقدمہ ءِ دیم ءَ آرگ بہ بیت۔

مہلب کمبر ءَ چہ انسانی ھکانی گلاں ھاسیں رنگ ءَ صلیب سرخ ءَ دزبندی کتگ کہ آ اے جیڑھ ءَ ھوار بہ بنت ءُ واحد کمبر ءَ را سیاسی بندیگ ءِ بستار ءَ رکھینگ بہ کن اَنت۔

زھرشانی کنوکاں زوراکی ءَ بیگواہ کنگ ءِ ھلاس کنگ ءُ واحد کمبر ءِ زوت برآمد کنگ ءِ لوٹ کتگ۔ آیاں گْوشتگ کہ زوراکی ءُ زوراکی ءِ وسیلگ ءَ آجوئی لوٹوکیں مردمانی بے توار کنگ ءِ ریاست ءِ کوشستاں جاور ھال گیش ءُ گیوار کتگ اَنت۔

ریلی ءِ تہا ھواریں بیگواھیں مردمانی دگہ سیاد ءُ وارساں ھم وتی نزیکیں مردمانی جان سلامتی ءِ لوٹ کتگ ءُ الزام جتگ کہ آمیدگس ءُ کمیشن ءِ وسیلگ ءَ انصاف ءِ پھجارینگ ءِ بدل ءَ ریاستی بیانیہ ءَ را گیش مھکم کنگ بوھگ ءَ اِنت۔

جلسہ ءِ وھد ءَ گشتانک دیوکاں گشتگ کہ بلوچستان ءَ برجاھیں تحریک ءِ سرکوب کنگ ءِ ھاتر ءَ ریاست ءِ پالیسی ءَ جیڑہ گیش گیوار کتگ انت۔ ریاستی زوراکی ءِ سوب ءَ مردم سلاہ بندیں گلانی نیمگ ءَ رھادگ بوھگ ءَ اَنت کہ اے دمگ ءَ گیشتر ناامنی پیداک کنگ ءَ اِنت۔

جلسہ ءِ بہر زوروکاں گڈسر ءَ واحد کمبر ءَ ہوار دگہ بلوچ سیاسی ءُ غیر سیاسی بیگواہیں مردمانی ہم زوت یلہ کنگ ءِ لوٹ کرتگ۔