لیاری ءِ وئیل ءِ ھلاپ ءَ ’’بلوچ کیلوانی دفاع‘‘ ءِ نام ءَ سرجمیں بلوچستان ءَ زھرشانی کنگ بیت ۔

لیاری ءِ وئیل ءِ ھلاپ ءَ ’’بلوچ کیلوانی دفاع‘‘ ءِ نام ءَ سرجمیں بلوچستان ءَ زھرشانی کنگ بیت ۔

زھرشانی ءُ دلبندین راجی مچی ءِ واستہ سرپدی ءِ مہم یکجائی ءَ برجم دارگ بنت۔

بلوچ یکوئی کمیٹی ءِ مرکزی جارکش ءَ گشتگ کہ دلبندین راجی مچی ءِ ھاتر ءَ جاری آگاہی مہم ءِ درگت ءَ گوستگیں روچ ءَ لیاری ءَ امن ءُ ایمنی ءِ مچی بوتگ بلے چو کہ دود انت ریاست پاکستان ءِ سرکار ءُ پاکستان پیپلز پارٹی ءِ نیمگ ءَ چھاپہ جنگ بوتگ ۔ پرامنیں مچی ءِ سرا بدترین زوراکی ءِ آماچ بوتگ انت۔ بلوچ یکوئی کمیٹی ءِ مرکزی رھشون لالا وھاب بلوچ، سمی دین بلوچ ءَ ھوار مئے بازیں ھمراھاں دزگیر کنگ بیتگ۔ بلوچ زالبول ناحق ءَ شش ءُ ھپت ساھت ءَ ٹارچر کنگ ءُ ٹارچر کنگ ءَ پد یل کنگ بیتگ اَنت بلے انگت ءَ لالا وھاب بلوچ ءُ دگہ ھمراھانی بابت ءَ ھچ وڑیں ھال ءُ اھوال دیگ نہ بیتگ۔

ریاست پاکستان ءُ پیپلز پارٹی ءِ سرکار ءِ نیمگ ءَ لیاری ءِ لس مچی ءِ سر ءَ اُرش بلوچ راج ءِ ھلاپ ءَ کینگ ءِ درشان اِنت ءُ بلوچ زالبولانی چادراں دست جنئگ بلوچ راجی چیدگانی سر ءَ مستقیم ارش اِنت۔ بلوچ راج ریاست پاکستان ءُ پیپلز پارٹی ءِ اے وڑیں بربریت ءُ زالمیں کاراں وتی راجی یات ءِ تہ ءَ داشت کنت ءُ وتی راجی شعور ءِ بھر جوڑ کنان ءَ آئی ءَ مزنیں راجی مزاحمت ءِ تہ ءَ بدل کنت۔ بلوچ زالبول ءُ پیریں مردم یلہ نہ کن اَنت، بلکیں کلیں بلوچ راج ایشانی پشت ءَ اوشتاتگ۔ بلوچ راج گوستگیں 77 سال اِنت کہ اے وڑیں بربریت ءُ زلم ءِ دیم ءَ اوشتاتگ ءُ اے وڑیں زھرناکیں کار مئے راجی مزاحمت ءِ زرمبش ءَ گیشتر منظم ءُ مھکم کنت۔

بلوچ نسل کشی ءِ یات کنگ ءِ روچ ءِ درگت ءَ ڈالبندین ءَ بلوچ راجی مچی ءِ بے سوب کنگ ءِ واستا ریاست پاکستان وتی سرجمیں واک ءُ زوراکی ءَ کارمرد کنگ ءَ اِنت۔ گوستگیں روچ ءَ لیاری ءِ وئیل ءَ ابید بلوچ یکوئی کمیٹی ءِ سروک ڈاکٹر ماہ رنگ بلوچ، مرکزی رہشون سبغت اللہ شاہجی ءُ دگہ ہمراہانی حلاف ءَ مستونگ ءُ نصیر آباد ءَ پرامن لس مچیانی برجم دارگ ءِ سرا ایف آئی آر درج کنگ بوتگ ءُ ہر دمگ ءَ انٹرنیٹ مھتل کنگ بوتگ۔ سروسز بند کنگ بوھگ ءَ انت ءُُ ایشی ءِ ناکام کنگ ءِ ھاترا رکاوٹ ایر کنگ بوھگ ءَ انت۔ بلے ریاست ءِ اے دراہیں زوراکیں پندل ءُ پندل ہر گام ءَ بے سوب بوہگ ءَ انت۔

گوستگیں روچ ءَ لیاری ءَ بوتگیں وئیل ریاستی ناشرکاری ءُ ظلم ءِ درشانی بوتگ۔ اے ناشرکاری ءُ زبردستی ءِ ھلاپ ءَ بلوچ یکجہتی کمیٹی باندا دوشمبے ءَ بگر داں سرجمیں بلوچستان ءَ ”بلوچ اقدار ءِ دفاع“ ءِ نام ءَ زھرشانی ءِ سلسلہ ءِ بندات کنت۔ دلبندین راجی مچی ءِ واستہ برجاھیں سرپدی ءُ زھرشانی سرجمیں بلوچستان ءَ یکجائی ءَ برجم دارگ بیت۔ بلوچ یکجہتی کمیٹی ءِ کارکن ءُ بلوچ راج دلبندین راجی مچی ءِ تیاری ءِ درگت ءَ وتی کاراں گیش ترند کن انت۔

#بلوچ نسل کُشی بند کن اِت

#بلوچ نسل کُشی ءِ یات کنگ ءِ روچ .