ماہ رنگ بلوچ ءَ چہ انسانی حقانی گلاں دزبندی انت کہ دلبندین ءَ اینٹرنیٹ ءِ بلیک آؤٹ ءَ نوٹس بہ زور انت
بلوچ جہدکار ماہ رنگ بلوچ ءَ انسانی حقانی گلاں گوں دزبندی کتگ کہ دلبندین ءَ انٹرنیٹ ءِ بلیک آؤٹ ءَ گیش ءُ گیوار بہ کن انت۔ آئی ءَ چہ میاں اوستمانی براتی ءَ ھم لوٹ کتگ کہ آ بلوچ راج ءِ بنیاتی ھک آنی رکھینگ ءِ وھد ءَ انٹرنیٹ سروسز ءِ بحالی ءِ تہ ءَ ھوار بہ بنت ءُُ دل یکیمی بہ کن اَنت۔
ایکس ءِ سر ءَ یک پوسٹے شیئر کنان ءَ آئی ءَ نبشتگ ”من چہ انسانی ھکانی گلاں دزبندی کن آں کہ آ دلبندین ءَ انٹرنیٹ ءِ بلیک آؤٹ ءِ سر ءَ زوت نوٹس بہ زور اَنت ءُ امنیں بلوچ راجی مچی ءِ سر ءَ بوت کنوکیں سرکچ ءِ دیم ءَ دارگ ءِ ھاترا سرگرمیں رنگے ءَ مداخلت بہ کن اَنت۔ اے وڑیں کار نہ ایوک ءَ اظہار ءُُ جم بوھگ ءِ آجوئی ءَ را ھلاس کن اَنت بلکیں زور ءُُ ڈیجیٹل سانسوری ءِ وسیلگ ءَ اختلاف ءِ سرکوبی ءِ یک خطرناکیں پیشگال ءِ ھم جوڑ کن اَنت۔”
”من اے گلاں گوں دزبندی کناں کہ آ واکداراں بے تاھیری ءَ انٹرنیٹ ءِ سروسز ءِ بحالی ءِ ھاترا زور بہ دنت ءُ اے گپ ءَ دل یکیمی بہ کنت کہ بلوچ راج ءِ امن ءُ ایمنی ءَ یکجاہ بوھگ ءُ وتی جیڑہانی درشان کنگ ءِ بنیاتی ھک ءِ احترام کنگ بہ بیت۔ اے سرکوبیں گامگیجانی دیم ءَ میان اُستمانی براتی بے توار مہ بیت، پرچا کہ آیانی بے تواری بلوچستان ءَ گیشتر انسانی ھکانی لگتمالی ءَ دلبڈی دات کنت۔‘‘ پوسٹ ءَ گیش کرتگ۔
زانگ بہ بیت کہ انٹرنیٹ ءِ بلیک آؤٹ چہ بلوچ نسل کشی ءِ یات ءِ روچ ءَ لہتیں روچ پیسر بوتگ کہ 25 جنوری ءَ ٹھینگ بوتگ ءُُ بلوچستان ءِ مہلوک یکجاہ بنت ءُُ برجاھیں زلم ءُُ زوراکیانی سرا زھرشانی کن انت۔
پنچ شمبے ءِ روچ ءَ ماہ رنگ بلوچ ءَ ایکس ءِ سر ءَ وتی پوسٹ ءِ تہ ءَ گْوشتگ کہ پاکستان ءِ واکداراں ڈالبندین ءَ انٹرنیٹ بلیک آؤٹ کتگ ۔ پوسٹ ءَ نوٹ کنگ بوتگ کہ ڈیجیٹل کریک ڈاؤن یک بے چینیں رجحان ءِ یاد ءَ دنت۔ ہمے وڑیں انٹرنیٹ ءِ بندش گوستگیں سال ءِ جولائی ءَ گوادر ءَ بلوچ راجی مچی ءِ وہد ءَ ہم ایر کنگ بوتگ انت کہ ایشی ءَ پد مراگش ءِ جارچین ءُ بہر زوروک بے دردی ءَ سرکوب کنگ بوتگ انت۔