نسیم بلوچ ءَ گوں بلوچ مزاحمت ءَ جہانی یکوئی ءِ لوٹ کتگ ءُ بلوچستان ءِ تہا پاکستان ءُ چین ءِ کرد ءِ سرا ایراد گپتگ
بلوچ نیشنل موومنٹ ءِ چیئرمین ڈاکٹر نسیم بلوچ ءَ گشتگ کہ پاکستان ءِ سرکار ءَ بلوچ سرڈگار ءِ سرا پراہ ءُ شاہگیں جنگی اُرش ءِ جار جتگ۔ اے مئے راجی، راج دوستی ءُ سیاسی فرض اِنت کہ ما اے جار ءِ سرا ھیال ءُ لیکہ بہ کنیں-آئی ءِ پیغام، ءُ پسّو ءِ سرا- راجی پڑ ءَ آئی ءِ تجزیہ ءُ سرپدی بہ دئیں، ءُ ھمے رد ءَ پسو بہ دئیں۔ اے وڑیں گپاں چہ دیم ءَ یا تھنا جار ءِ رنگ ءَ مہ چار اِت، پرچا کہ اے گپ چہ دیم ءَ شنگ ءُ تالان اَنت ءُ باز جہت اَنت۔ منی ھیال ءَ اے سرکاری پیسلہ ءُُ جار ءِ درستیں تک ءُُ پھنات آنی سر ءَ جوانیں رنگ ءَ چار ءُُ تپاسی ءُُ سرپدی ءِ وسیلگ ءَ راجی تک ءَ یک سرجمیں پسو ءِ جوڑ کنگ لوٹ ایت۔
اولی ایش کہ ما یک راجے ءِ بستار ءَ اے گپ ءَ بہ چاریں کہ پاکستانی سرکار مدام اے گپ ءِ دعویٰ ءَ کنت کہ بلوچستان ءَ فوجی آپریشن کنگ بیت-آؤکیں اُرشانی دھمکی بار بار دیگ بیت۔ زبان ءُُ خاصیں لبز ءِ کارمرز کنگ ادا یک زانتگیں نفسیاتی تاکتیک یے، کہ ”آؤکیں زمانگ“ ءَ کارمرز کنت کہ بازیں مول ءُُ مراداں سرجم بہ کنت: جاری فوجی کارروائیانی پُشدر کنگ، ہتکناکیں اجتماعی سزا، ءُُ نسل کشی، ہمے وھد ءَ لس مھلوک ءِ دلگوش ءَ چہ حقیقی جیڑہ ءُُ انوگیں جاوراں چہ کشگ بیت یک متوقع آپریشن ءِ دروشم ءَ۔ اے رِد ءُ بند داتگیں ءُ نوکیں پروپیگنڈا ءِ مول ءُ مراد ایش اِنت کہ بلوچستان ءَ اے وھد ءَ پاکستانی ریاست ءُ لشکری سرگرم نہ اَنت ءُ کجام ھم کارروائی ایوک ءَ دیم ءِ یا آیوکیں روچاں بیت۔
اے رھبند ءِ وسیلگ ءَ پاکستانی ریاست ءُ لشکر نہ ایوک ءَ وتی برجاھیں کاراں پُشدر کنت بلکیں وتی راج ءِ تہ ءَ دروگیں بیانیہ یے ھم دیم ءَ کاریت ءُ اے گپ ءِ پدر کنگ ءَ اِنت کہ بلوچستان ءَ انگت ءَ ھچ وڑیں ھاسیں گامگیج زورگ نہ بوتگ۔ ھمے وھد ءَ آ بلوچ ءَ گوں آیوکیں دھمکیاں ترسینگ ءِ جھد ءَ کن اَنت ءُ چہ انوگیں جنگی کارانی شدت ءُ ھرابکاری ءِ سر ءَ دلگوش دیگ ءَ رکّین اَنت۔
بلوچستان ءِ جغرافیائی اهمیت ءَ پہ پاکستانی ریاست ءُ لشکر ءَ ابید، آئی ءِ بے لگامیں وسیلگاں کارمرز کنگ ءَ، ءُ آئی ءِ اسٹریٹجک سوداگری ءِ کرد ءَ ابید، بلوچ راج ءَ گوں ایوک ءَ یک کالونی ءُ غلامیں آبادی یے ءِ رنگ ءَ چارگ بیت۔ ما باز براں اے گپ ءِ سر ءَ زور دئیں کہ بلوچستان یک معدنی وسیلگاں چہ مالا مالیں دمگے، پدا ھم اے مال ءُ مڈی وتی نندوکاں روچے دو ورگ ءُ امن ءُ ایمنی ءِ زند ءِ ھم آسراتی دات نہ کنت۔ حقیقی امن ءُ ایمنی ءِ ھاترا ایوک ءَ آزاتیں زمین ءِ سر ءَ رس اِت کنت کہ اودا مردم وتی وسیلگ ءِ ملکیت ءَ بہ دار اَنت۔ اے فوجی آپریشن ایوک ءَ اسٹریٹجک سیکورٹی یا قبضہ ءِ مھکم کنگ ءِ ھاترا نہ اَنت بلکیں بلوچ راجی وسیلگ ءِ لٹ ءُ پُل ءِ برجاہ دارگ ءِ ھاترا یک میکانزمے ءِ بستار ءَ کار کن اَنت۔ اے کارروائیانی آڑ ءَ فوج، آئی ءِ گوں ہمگرنچیں ادارہ ءُُ مزنیں فوجی افسر باقاعدہ دفاعی بجٹ ءَ چہ گیش گیشیں بجٹ ءُُ مراعات ءِ ہاترا جہد کن انت۔ اے گپ ءِ ثبوت بلوچستان ءَ تعیناتیں مزنیں فوجی افسرانی ذاتی مال ءُُ مڈی انت کہ آہانی مال ءُُ مڈی باز براں دو سال ءِ تہا ارباں ڈالر ءَ سر بیت۔ اے مال ءُ مڈی بلوچ راج ءِ ھون ریچی ءُ مڈّیانی لُٹ ءُ پُل ءِ وسیلہ ءَ یکجا کنگ بیت۔
ہر وھد ءَ کہ ریاست نوکیں ءُ گیشتر ھرابیں کارانی جار ءَ جنت گڑا اے منّگ اِنت کہ گوستگیں دو دہائیانی تہ ءَ بلوچ مزاحمتی گلاں گوریلا جنگ ءِ وسیلگ ءَ سوبمندیں رنگے ءَ چیلنج کتگ۔ اے گل وتی پناہ گاہ ءُ بلوچستان ءِ مزنیں جغرافیہ ءُ ناہمواریں کوہانی سرا راجی حمایت ءِ وسیلہ ءَ بار بار فوج ءِ سرا اُرش کن انت۔ گوریلا جنگی حکمت عملی ءِ ہمراہی ءَ راج ءِ مزنیں حمایت ءِ سبب ءَ آ پاکستانی لشکر ءِ سرا اُرش کنگ ءُُ ایمنیں جاہانی نیمگ ءَ پُشت ءَ کپگ ءِ اہل بنت۔ گوستگیں بیست سال ءِ جنگی راجدپتر اے گپ ءِ گواہی ءَ دنت کہ پاکستانی لشکر اے رھبند ءِ سر ءَ جوانیں رنگے ءَ پسو دیگ ءَ بے سوب بوتگ۔ نتیجہ ءَ فوج وتی ناکامیانی سرا وتی ناامیتی ءَ عام بلوچ شہریانی سرا کشیت ءُُ راج ءَ را چہ تحریک ءَ درکپگ ءُُ ریاستی نظام ءَ منگ ءِ جہد ءَ اجتماعی سزا ءِ آماچ کنت۔ اے اجتماعی سزا ءِ حکمت عملی ءِ رد ءَ پاکستانی لشکر بے سلاہیں شہری ءُ وانندہیں ورناہاں نشانگ جوڑ کنت ءُ زوراکی ءَ بیگواہ کنت ءُ غیر انسانی ٹارچر ءِ آماچ کنت ءُ باز براں چہ عدالت ءَ دریں وڑے ءَ کشیت۔ اے زلم ءُ زوراکی اے گپ ءِ پدریں ثبوت اَنت کہ ریاستی مشینری وتی ناکامی ءِ منگ ءِ بدل ءَ پیسر ءَ چہ مظلومیں راج ءِ سر ءَ وتی اُرش ءَ گیش کنگ ءَ اِنت۔
بلوچستان ءِ تہ ءَ ریاستی بیان ءُ برجاھیں جنگی زوراکی یک جہلیں پندل ءِ بھر اَنت کہ آئی ءِ مول ءُ مراد بلوچ راج ءَ چہ آئی ءِ بُنکی ھکاں زبھر کنگ ءُ آئی ءِ سرڈگار ءِ مڈّی ءُ مڈّیانی پائش کنگ اِنت۔ اے کار نہ ایوک ءَ انسانی حقانی لگتمالی ءَ کن اَنت بلکیں میان استمانی قانود ءُ اصولانی ھلاپ ءَ ھم اَنت۔ دنیا ءَ اے گپ منگی اِنت کہ بلوچستان ءِ راج وتی ھک ءُ آجوئی ءِ ھاترا جھد کنگ ءَ اِنت ءُ چہ آھاں وت واجھی ءِ ھک ءَ زبھر کنگ مزنیں ناانصافی یے ۔
وھد اتکگ کہ بلوچ راج ءِ ھک ءُ آئی ءِ مزاحمت ءِ سرا جھان ءِ تک ءَ منگ بہ بیت ءُ ریاستی زلم ءُ زوراکیانی ھلاپ ءَ یکجاھیں توار چست بہ بیت۔ ریاستی سرکوبین ءُ نفسیاتی پندلاں چہ بلوچ راج ءِ حوصلہ ھلاس نہ بنت؛ بلکیں آ وتی آجوئی ءِ جھد ءَ گیشتر مھکم کن اَنت۔
اے سرجمیں جاور ھال ءِ بابت ءَ میان استمانی ادارہانی بے تواری ءُ بے عملی اے نسل کشی ءِ تہا ھمدستی ءِ برابر اِنت۔ اے بے عملی نہ ایوک ءَ انسانی ھکانی مزنیں لگتمالی یے بلکیں میان استمانی چاگرد ءِ وتی اخلاقی ءُ قانونی ذمہ واریانی سرا بے ھیال بوھگ ءِ عکس اِنت کہ بلوچ راج ءِ رنج ءُ گماں گیشتر گیش کنت۔
بلوچستان ءَ پاکستان ءِ برجاھیں فوجی زوراکی ءُ نسل کشی ءِ تہ ءَ چین ءِ گیش بوھوکیں ھوار بوھگ یک ناقابل تردیدیں راستی یے جوڑ بوتگ۔
ڈاکٹر بلوچ ءَ میان استمانی براتی ءَ را ھال داتگ کہ بلوچستان ءَ پاکستان ءِ برجاھیں فوجی زوراکی ءُ نسل کشی ءِ تہ ءَ چین ءِ گیش بوھوکیں ھوار بوھگ یک ناقابل تردیدیں راستی یے جوڑ بوتگ۔ چین ءَ نہ ایوک ءَ بلوچستان ءِ تہ ءَ پاکستانی ریاست ءِ زوراکی ءِ حمایت کتگ کہ آ وتی سامراجی ءُُ توسیپ پسندیں عزائم ءِ رکھینگ ءَ بہ کنت بلکیں مالی ءُُ تکنیکی وسیلگاں چہ آئی ءَ را گیشتر مھکم کتگ۔ گوادر پورٹ ءُ سی پیک ءِ وڑیں پروجیکٹ ایشی ءِ پدّریں ثبوت اَنت۔ چین ءِ سامراجی ایجنڈا ، خاص کر سی پیک ، یک استحصالی منصوبہ یے کہ بلوچ راج ءِ مرضی ءِ ھلاپ ءَ مسلط کنگ بیت۔ اے پندلانی چیر دستی ءَ بلوچ راج چہ وتی زمیناں پہ زور درکنگ بوھگ ءَ اِنت، ءُ آئی ءِ طبیعی مڈی زُرتگ اَنت۔ ایشی ءِ جواب ءَ بلوچ راج ہر تک ءُ پھنات ءَ مزاحمت کنگ ءَ انت۔ بلے پاکستان اے مزاحمت ءَ دیمروئی ءِ راہ ءَ رکاوٹ یا جھان ءِ سازشانی بھرے ءِ رنگ ءَ دیم ءَ کاریت ءُ ھمے وھد ءَ زلم ءُ زوراکی ءُ جنگی جرماں کنت۔ اے میان ءَ چین بلوچ سرڈگار ءِ سر ءَ گوں ھاسیں سامراجی ءُ توسیپ پسندیں ارادہ ءَ زاھر ءَ ھست اِنت۔ اے گپ پہ بلوچ ءِ سرڈگار، راجی پجار، ءُ زندگ بوھگ ءَ مستقیمیں ھترہ یے ءِ دیم ءَ کاریت۔ پدا چین دمگی حاکمیت ءِ برجاھیں جہد ءَ وتی بالادستی ءِ دعویٰ کنگ ءِ جہد ءَ اِنت۔ چین ءُ پاکستان ءِ اتحاد مئے وطن ءِ سرا سرگرمیں رنگے ءَ تجاوز کنگ ءَ اِنت بلے ما ہر محاذ ءَ ایشی ءِ دیم ءَ اوشتات کنیں۔