“پاکستانی لشکر ءَ زوراکی ءَ بیگواہ کتگیں مردمانی کُشگ، آیانی ٹپّ ءُ ٹوریں لاش رد کنگ”: ماہرنگ بلوچ

“پاکستانی لشکر ءَ زوراکی ءَ بیگواہ کتگیں مردمانی کُشگ، آیانی ٹپّ ءُ ٹوریں لاش رد کنگ”: ماہرنگ بلوچ
بلوچ جھدکار مھرنگ بلوچ ءَ گوستگیں بیست ءُ چار کلاکانی تہ ءَ بلوچستان ءَ پہ زور بیگواھیں مردمانی چار ٹپ ءُ ٹوریں لاشانی پجارینگ ءِ سر ءَ دلپدردی درشان کتگ ءُ انسانی ھکانی ادارگاں گوں دزبندی کتگ کہ اے جیڑھ ءَ ترندیں نوٹس بہ زور اَنت۔ آئی ءَ پاکستانی لشکر ءِ سر ءَ زوراکی ءَ بیگواھیں مردمانی کُشگ ءُ آیانی ٹپ ءُ ٹوریں لاش ءِ رد کنگ ءِ الزام جتگ۔

ماہ رنگ بلوچ ءَ گشتگ کہ فقیر جان ءُ عیسی بلوچ ءِ نام ءَ دو مردمانی جون آواران ءَ دز کپتگ انت۔ آئی ءَ گوشت کہ فقیر جان 26ستمبر ءَ پاکستانی لشکر ءَ چہ وتی لوگ ءَ دزگیر کنگ ءَ پد زوراکی ءَ بیگواہ کتگ وھدے کہ عیسیٰ بلوچ فروری 2023 ءَ زوراکی ءَ بیگواہ کنگ بوتگ۔

مھرنگ بلوچ ءَ ایکس ءِ سر ءَ نبشتگیں پوسٹے ءِ تہ ءَ گْوشتگ ” گوستگیں بیست ءُ چار کلاکانی تہ ءَ # بلوچستان ءَ زوراکی ءَ بیگواھیں مردمانی چار ٹپ ءُ ٹوریں لاشانی پجارینگ سکیں جیڑگ ءِ گپے ۔ گوستگیں روچ ءَ آواران ءَ دو مردمانی جون دست کپتگ کہ آیانی پجار فقیر جان ءُ عصی بلوچ ءِ نام ءَ بوتگ۔ فقیر جان 26 ستمبر 2024 ءَ پاکستانی لشکر ءَ چہ وتی لوگ ءَ دزگیر کنگ ءَ پد زوراکی ءَ بیگواہ کتگ ات ءُ عیسیٰ 17 فروری 2023 ءَ زوراکی ءَ بیگواہ کتگ ات۔”

”مرچی چہ خضدار ءِ دمگ زہری ءَ دو ٹپ ءُ ٹوریں لاش برآمد کنگ بوتگ کہ آہانی پجار غلام حسین ءِ چُک عابد حسین ءُ زہری ءِ نندوکیں گوہر خان ءِ چُک مستی خان انت۔ ھر دوئیں 2017 ءَ پاکستانی لشکر ءِ دست ءَ زوراکی ءَ بیگواہ کنگ بوتگ اَنت۔”

آئی ءَ گوشت کہ گوادر ءَ چہ زوراکی ءَ بیگواہ کنگ بوتگیں بشیر احمد ءِ ٹپ ءُ ٹوریں لاش ھم برآمد کنگ بوتگ۔

”اے میان ءَ لھتیں روچ پیسر چہ گوادر ءَ زوراکی ءَ بیگواہ بوتگیں بشیر احمد ءِ ٹپ ءُ ٹوریں لاش ھم برآمد کنگ بوتگ اگاں چہ سیکورٹی فورسز ءَ آئی ءِ دزگیری ءِ سرکاری رنگ ءَ من اِتگ۔ ھمے وڑ ءَ لھتیں روچ پیسر ماں تربت ءَ اسرار بلوچ نامیں ورناھے ءِ ٹپ ءُ ٹوریں لاش دست کپتگ۔ حقوق بشر ءِ ادارہ اے سنگینیں جیڑہ ءَ زوت سرپد بہ بنت۔ پاکستانی لشکر زوراکی ءَ بیگواھیں مردماں کُشگ ءَ اِنت ءُ آیانی ٹپ ءُ ٹوریں لاشاں یلہ دیگ ءَ اِنت۔‘‘ آئی ءَ ایکس ءِ سر ءَ پوسٹ کتگ۔

بلوچ راجی تحریک ءِ انسانی حقانی پربند “پانک” ءَ بلوچستان ءِ ضلع آواران ءَ پاکستان ءِ سیکورٹی فورسز ءِ دست ءَ فقیر جان ءُ عصا بلوچ ءِ غیر عدالت ءِ کوش ایر جتگ۔

لھتیں ماہ پیسر پاکستانی لشکر ءَ چہ کنری بازداد سید محمد ءِ بچ فقیر جان ءُ چہ پاہو نور دین ءِ بچ عصا بلوچ پہ زور آوار جتگ اَت۔ انسانی حقانی گل ءَ گشتگ کہ اے دوئیں مردم ماہانی ماہانی زوراکی ءَ بیگواہ کنگ ءَ پد کُشگ بوتگ انت۔

پانک ءَ ایکس ءِ سر ءَ نبشتگیں پوسٹے ءِ تہ ءَ گْوشتگ ” سید محمد ءِ چُک ءُ کنری بازداد ءِ نندوکیں فقیر جان 26 ستمبر 2024 ءَ پاکستانی لشکر ءِ دزگیر کنگ ءَ پد زوراکی ءَ بیگواہ کنگ بیتگ۔ آسا بلوچ چہ پاہو ءَ نور دین ءِ چُک 17 فروری 2023 ءَ ھمے وڑیں جاوراں زوراکی ءَ بیگواہ کنگ بوتگ ءُ ھر دوئیں مردم 30 نومبر 2024 ءَ آواران ءِ دمگ بزداد بربوڈونک ءَ یک مرحلہ واریں دیم پہ دیم بوھگ ءِ تہ ءَ کُشگ بوتگ اَنت۔”

پانک ءَ اے گپ ءِ سر ءَ دلگوش گور کت کہ اے کار انسانی ھک ءُ میاں اوستمانی کانود ءِ مزنیں لگتمالی ءِ نمائندگی کن اَنت ءُ پاکستانی سرکار ءَ چہ لوٹ کرتگ کہ آ اے کوشانی سر ءَ زوت ءُ شُھازیں پٹ ءُ پول ءَ بہ کنت۔

ایکس ءِ سر ءَ نبشتگیں پوسٹ ءَ پانک ءَ گیشتر گْوشتگ: اے کار انسانی ھک ءُ میان اُستمانی کانود ءِ مزنیں لگتمالی ءِ نمائندگی کن اَنت کہ ایشی ءِ تہ ءَ زوراکی ءَ بیگواہ کنگ ءُ چہ عدالت ءَ دریں اعدام ھوار اَنت۔ ما پاکستانی سرکار ءَ گوں دزبندی کنیں کہ اے کوشانی سر ءَ زوتیں ، شپچراگ ءُ بے رھبندیں پٹ ءُ پولے بہ کنت ءُ زمہ واراں احتساب بہ کنت ءُ بلوچستان ءَ زوراکی ءَ بیگواہ کنگ ءُ غیر عدالت ءِ کشتار ءِ نظامی کارمرد کنگ ءَ را ھلاس بہ کنت۔ اے زُلم ءُ زوراکیانی دیم ءَ میان اُستمانی براتی بے تواری ءَ مہ نند ایت۔ عدالت پہ قربانی ءُ آہانی کھولاں غالب بہ بیت۔”