تربت: بلوچستان ءِ ضلع کیچ ءَ چہ زوراکیں بیگواھیں شش مردینانی سیاد ءُ وارساں دھمکی داتگ کہ اگاں آیانی نزیکیں مردم سرکاری رنگ ءَ پیش کنگ مہ بنت یا آیوکیں دو روچ ءِ تہ ءَ آیانی ھال ءُ اھوال ءِ بابت ءَ ھچ وڑیں ھال ءُ اھوال مہ بیت گڑا زھرشانی کنگ بیت۔
مرچی تربت پریس کلب ءَ پریس کانفرنس ءَ ھانداناں کیسانی ھال ءُ اھوال شیئر کتگ ءُ وتی بیگواھیں نزیکیں مردمانی زوت یلہ کنگ یا پیش کنگ ءِ لوٹ کتگ۔
تربت اپسر ءِ ھاندان ءِ مردمے ءَ اے گپ پدر کتگ کہ 10 دسمبر ءَ پاکستانی سیکورٹی فورسز ءَ سئے برات احسان منظور، عطیف افضل منظور ءُ حامد منظور دزگیر کتگ ءُ ناشناسیں جاھے ءَ دیم داتگ اَنت۔
چہ همے روچ ءَ اے سئیں برات پہ زور بیگواہ کنگ بوتگ اَنت۔
ایشی ءَ ابید پریس کانفرنس ءَ ھواریں دگہ جنینے ءَ شیئر کتگ کہ آئی ءِ ھاندان ءِ سئے مردم ھم زوراکی ءَ بیگواہ کنگ بوتگ اَنت۔ آئی ءَ درائینتگ کہ شمس الدین چار سال پیسر تربت ءَ پاکستانی لشکر ءَ زوراکی ءَ بیگواہ کتگ۔
اے ماہ ءَ دگہ دو نزیکیں مردم شہاب ءُ عبدالوہاب سیکورٹی فورسز ءَ برتگ اَنت ءُ شہاب 18 روچ پیسر دزگیر کنگ بوتگ ءُ عبدالوہاب گوستگیں پنچ روچاں بیگواہ اِنت۔
سیاد ءُ وارساں سکیں جیڑہ ءِ درشانی کتگ ءُ گشتگ کہ بیگواہی ءَ بے دروریں پریشانی ءِ سوب جوڑ بوتگ ءُ ھاندان بے وسی ءُ غم ءِ جاور ءَ یلہ داتگ انت۔
پریس کانفرنس ءِ وھد ءَ ھانداناں یک سرکاری اپیل ءِ شنگ کتگ ءُ لوٹ کتگ کہ اگاں آھانی نزیکیں مردم ھچ وڑیں جرم ءِ آماچ اَنت گڑا آمید گس ءَ پیش کنگ بہ بنت ءُ شفافیں مقدمہ ءِ اجازت دیگ بہ بیت۔ اے گپ ءَ آہاں دلیل دات کہ اے گپ ءَ چہ غم ءِ آماچیں ھانداناں انصاف ءُ بندش رس ایت۔
آہاں بنجاہی حکومت ءُُ ہمگرنچیں واکداراں چہ لوٹ کتگ کہ آ وتی نزیکیں مردمانی سلامتیں واتر بوہگ ءِ ھاتر ءَ زوت گامگیج بہ زور انت ءُُ آہاں ہما زانتکاری ءِ رسگ ءَ بہ دنت کہ آہاں سک باز لوٹ اتگ۔
سیاد ءُ وارساں کیچ ءِ دمگی واکداراں ھم بیھار داتگ ءُ لوٹ کتگ کہ اگاں آیانی نزیکیں مردم یل کنگ نہ بنت یا اگاں آیوکیں دو روچانی تہ ءَ ھچ وڑیں ھال ءُ اھوال دیگ مہ بیت گڈا آ لاچار کنگ بنت کہ زھرشانی ءَ بہ کن اَنت۔
ایشاں گیش کرتگ کہ اے زھرشانی ھرچ ھاسیں جاھے ءَ بوت کنت، ایشی ءِ تہ ءَ سی پیک ءِ راہ ھم ھوار اِنت، ایشی ءِ بابت ءَ رند ءَ جار جنگ بیت۔
بیگواھیں مردانی سیاد ءُ وارساں اے گپ ءِ سر ءَ زور داتگ کہ اے جاور ھال ءِ سرجمیں ذمہ واری ضلعی انتظامیہ ءُ واکدارانی سر ءَ اِنت۔