زنیرہ قیوم بلوچ ءِ سفر چہ بلوچستان ءَ داں COP29 ءَ

بلوچستان ءِ چاردہ سالی آب و ہوا ءِ جہدکار زنیرہ قیوم بلوچ جنکانی وانگ ءُ زانگ ءُ آب و ہوا ءِ کارروائی ءِ منوگر اِنت۔ COP29 ءِ تہا آئی ءَ موسمیاتی بدلی، وانگ ءُ زانگ ءُ صنفی برابری ءِ تپاوت ءِ سرا زور داتگ۔

بیست ءُ نُھمی کانفرنس ءِ پارٹیانی (COP29) ءَ جھان ءِ رھشون، جھدکار، زانتکار ءُ دگہ بازیں مردم یکجاہ بوتگ اَنت کہ آھانی تہ ءَ 14 سالی زنیرہ قیوم بلوچ ھم ھوار اِنت کہ آ موسمیاتی بدلی ءِ توانمندیں جھدکار ءُ ڈسٹرکٹ حب چوکی ءِ ایوارڈ زُرتگیں پٹ ءُ پولکار اِنت۔ آ چہ بلوچستان ءِ دوریں دمگاں ، خاص چہ خضدار ءِ دمگ زہری ءِ شھر ءَ اِنت۔ زنیرہ اے وھد ءَ حب چوکی ءَ ھشتمی کلاس ءَ وتی بُنکی وانگ ءَ اِنت۔ آ وتی چاگرد ءِ جنکاں بدلی ءِ ایجنٹ ءِ بستار ءَ بااختیار کنگ ءِ ھاترا کار کنگ ءَ اِنت۔ زنیرہ موسمیاتی بدلی، وانگ ءُ زانگ ءُ صنفی برابری ءِ سرا دلگوش دنت ءُ آ گوں میان استمانی گل یونیسیف ءَ ہم ہمگرنچ انت۔

گوستگیں روچاں زنیرہ قیوم بلوچ ءَ آذربائیجان ءِ شھر باکو ءَ اقوام متحدہ ءِ نیمگ ءَ موسمی بدلی ءِ بابت ءَ برجم داشتگیں بیست ءُ نھمی کانفرنس ءِ تہ ءَ بھر زرتگ۔ زنیرہ ءِ COP29 ءِ نامزدگی یک مزنیں سوبمندی یے، پرچا کہ بلوچستان ءِ 14 سالی جنک ءَ اے دیوان ءَ بہر زرتگ۔ آئی ءِ گمان اِنت کہ وانگ ءُ زانگ پہ جنکاں “تبدیلی ءِ ایجنٹ” جوڑ بوھگ ءُ وت ءُ وتی چاگرد ءَ را توانمند کنگ ءِ مستریں راہ اِنت۔

زنیرہ قیوم بلوچ ءَ گوں دلجمی ءَ گْوشتگ: من موسمی بدلی ءِ رد ءَ ’’جنک آنی وانگ ءُ زانگ ءِ ھک‘‘ ءِ سر ءَ دلگوش دیگ ءِ گچین کتگ پرچا کہ منی ھیال ءَ وانگ ءُ زانگ یک بنیاتی ھکے کہ آ مردماں ھاسیں رنگ ءَ جنکاں بدلی ءِ ایجنٹ جوڑ کنگ ءِ ھاترا توانمند کنت۔ آئی ءَ گیش کرتگ کہ “آب و ہوا ءِ بدلی ءَ چہ جنک ءُ جنیناں ھوار نزوریں آبادی ءَ را بے تناسبیں رنگے ءَ تاوان رسیت۔ منی مول ءُ مراد چہ جنک ءِ وانگ ءُ زانگ ءِ حمایت کنگ ءَ موسمیاتی بدلی ، وانگ ءُ زانگ ءُ جندر ءِ برابری ءِ تپاوت ءِ گیش ءُ گیوار کنگ اِنت۔”

زنیرہ ءَ موسمی بدلی ءِ آفتاں بلوچستان ءَ را چونیں تاوان داتگ ءُُ اے بدلی آں چہ آماچیں زھگاں اے بابت ءَ وتی جیڈھ آنی درشانی کت، COP29 ءَ ماہرین آنی گوما جتا جتائیں سیشن آنی تہ ءَ۔

“ورنا موسمیاتی تعلیم، قابل تجدید توانائی، ساپیں پیئگ ءِ آپ، ءُ فیصلہ سازی ءِ عمل ءِ بہر بوھگ لوٹ ایت” آئی ءَ یک سیشن ءِ تہا گشتگ۔

یونیسیف ءِ بیان ءِ تہا زنیرہ قیوم ءَ گشتگ کہ بلوچستان ءَ نندگ ءَ من موسمیاتی بدلی ءِ تباہ کنوکیں اثرات ءِ وتی چماں گوں دیستگ۔ ”سیل ءُ گرم ءِ لہر مئے نوکیں حقیقت جوڑ بوتگ انت، مئے زند ءَ را متاثر کتگ ءُ مئے آیوکیں باندات ءَ را ھترناک کتگ۔ تبدیلی آب و ہوا یک بحران حقوق کودکان. درجہ حرارت ءِ گیش بوھگ ءُ موسم ءِ شدیدیں وئیل مئے جان سلامتی، وانگ ءُ زانگ ءُ وشھالی ءَ را ھترناک کن اَنت۔”

COP29 ءِ واستہ آئی ءِ نام ءِ لسٹ کنگ آئی ءُ بلوچستان ءِ واستہ مزنیں سوبمندی یے ۔ آ وتی چاگرد ءُ راج ءِ وکالت کنگ ءَ ستارہ جوڑ بوت۔ ’’من باکو ءَ COP29 ءَ بہر زورگ ءِ وس ءَ بوتگ آں ۔ منی تجربہ بصیرت ءُ بااختیار ات۔ من ءَ گلوبل لیڈراں گوں نیٹ ورک کنگ ءُُ مزنیں کچے ءَ گپ ءُُ تران ءَ بہر زورگ ءِ موہ رستگ ات۔”

دیمتر ءَ زنیرہ ءَ وتی کیریئر ءِ مول ءُ مراد ءُ برجاہیں سرگرمی ءِ بابت ءَ وتی ھیال ءُ لیکہ شیئر کتگ اَنت۔ “منی کار ءِ مول ءُ مراد ایش انت کہ من جنک ءِ وانگ ءُ زانگ ءُ آب و ہوا ءِ کارروائی ءِ ھاترا دیم ءَ برگ ءَ آں ۔ من ماحولیاتی پالیسی، تعلیم، یا ہمگرنچیں پڑ ءِ تہا کیریئر ءِ رندگیری کنگ ءِ ارادہ کناں، کہ اودا من بامردیں اثرے کت کناں۔ “من ھم ھما ادارہانی گوما کار کنگ ءِ واھشت مند آں کہ آ یک گیشتر پائیدار ءُ منصفانہ دنیا ءِ جوڑ کنگ ءِ ھاترا منی شوق ءَ شریک اَنت۔”

مارا اے گپ ءِ پدر کنگ لوٹ ایت کہ نزوریں ٹک ، ھاسیں رنگ ءَ جنک ، وانگ ءُ زانگ ءِ وسیلگ ءَ توانمند کنگ بہ بنت ءُ مئے آیوکیں باندات ءِ رکھینگ ءِ ھاترا موسمیاتی بدلی ءِ گرانیں ھترہ ءَ را زوتیں بنیاد ءَ گیش ءُ گیوار کنگ بہ بیت

’’من اے وھد ءَ یونیسیف ءَ گوں ھمگرنچ آں ۔ البت جنک ءِ وانگ ءُ زانگ ءُ موسمی بدلی ءِ بابت ءَ منی کار بُنکی ھساب ءَ وت مہ وتی اِنت ءُ من وتی اثر ءَ گیش کنگ ءِ ھاترا جتا جتائیں گل ءُ مردماں گوں ھمکاری کناں۔”

من یونیسیف ءِ نیمگ ءَ موسمیاتی چیمپئن ءِ بستار ءَ گچین بوتگ آں ، ” زنیرہ ءَ شیئر کتگ۔ “COP29 ءَ من ءَ اُمیت بوتگ کہ موسمی بدلی، وانگ ءُ زانگ ءُ جندر ءِ برابری ءِ ٹکّ ءُ ٹکّ ءِ بابت ءَ سرپدی دیگ بہ بیت ءُ بلوچستان ءِ وڑیں نزوریں چاگردانی نیمگ ءَ زوتیں گامگیج ءِ ھکل دیگ بہ بیت۔”

موسمیاتی بدلی ءُُ دگہ جیڈھ آنی سر ءَ وتی وکالت ءِ گوما آئی ءَ سرپدی ءِ پروگرام ءُُ تربیتی سیشن ھم کتگ اَنت۔ ’’ہاں من بلوچستان ءَ جنک آنی وانگ ءُ زانگ ءُ موسمی بدلی ءِ وکالت ءِ ھاترا سرپدی پروگرام کتگ، چوش کہ ورنا آنی وکالت ءِ رہشونی ءِ تربیت۔ ما چیلنجانی دیم ءَ اتکگیں، چوش کہ والدین ءَ را دلجم کنگ،” آئی ءَ شیئر کتگ۔

آئی ءَ وتی ھاندان ءِ کمک ءِ بابت ءَ ھم گپ جتگ۔ ”منی ھاندان ءَ منی فعالیت ءِ بے دروریں حمایت کتگ۔ منی رول ماڈل منی مات ءُ پت اَنت، چیا کہ آ من ءَ سکین دئینت کہ من ھچبر مہ بند آں ءُ دگہ رنگے ءَ مہ کن آں. ایشانی مثبت بدلی ءِ پیداک کنگ ءِ ھاترا وتی زند ءِ ندر کنگ ءُُ مشکلات ءِ دیم ءَ ایشانی ہمت من ءَ وتی کار ءَ برجاہ دارگ ءِ ھاترا دلبڈی دنت۔”

زنیرہ ءَ زور پر دات کہ دنیا ءِ رہشوناں موسمیاتی بحران ءِ گیش ءُ گیوار ءِ ھاتر ءَ زوتیں، اجتماعی ءُ مہتواکانکشی گامگیج زورگ لوٹیت۔ “مارا اے گپ ءَ را دل یکیمی کنگ لوٹ ایت کہ نزوریں ٹک ، ھاسیں رنگ ءَ جنک ، وانگ ءُ زانگ ءِ وسیلگ ءَ بااختیار کنگ بنت ءُ مئے آیوکیں وھد ءِ رکھینگ ءِ ھاترا موسمیاتی بدلی ءِ گرانیں ھترہ ءَ را زوتیں بنیاد ءَ گیش ءُ گیوار کنگ بہ بیت۔”