شال: بلوچستان ءِ دمگ بُلیدا ءَ پاکستانی سیکورٹی فورسز ءِ سئے گاڑیانی کاروان ءِ سر ءَ کمین ءِ ذمہ واری بلوچ لبریشن آرمی ءَ وتی سرا زرتگ ءُ بازیں کارندہ ٹپیگ بوتگ اَنت۔
اے گل ءَ وتی جارکش آزات بلوچ ءِ نیمگ ءَ شنگ بوتگیں بیان ءِ تہ ءَ گْوشتگ کہ آئی ءِ سرمچاراں 19 اکتوبر ءَ بلیدہ ءِ دمگ کورپوشت ءَ سیکورٹی فورسز ءِ گشت ءِ نشانگ جوڑ کتگ۔
بیان ءِ رد ءَ بی ایل اے ءِ سرمچاراں شپ ءِ چار بج ءِ نزیک ءَ پوزیشن زرتگ ءُ راکٹ لانچر ءُ آٹومیٹک سلاہ آنی کارمردی ءَ کاروان ءِ سر ءَ اُرش کتگ۔ اے گل ءَ برجاہ داشتگ کہ اُرش ءِ وھد ءَ بازیں سیکورٹی کارندہ ٹپیگ بوتگ اَنت۔
بی ایل اے ءَ گیش کرتگ کہ سیکورٹی فورسز ءَ دراجیں درگیری ءِ بدل ءَ وتی گاڑیانی تہ ءَ چہ دمگ ءَ پُشت کش اِتگ۔ اے گل ءَ گْوشتگ کہ آئی ءِ جنگول پد ءَ وتی جاہ ءَ وش ءُ سلامت واتر بوتگ اَنت۔
بی ایل اے ءَ گْوشتگ: داں بلوچستان ءِ سرجمی ءَ آجوئی ءُ پاکستانی لشکر چہ دمگ ءَ درکپگ ءَ وتی سلاھبندیں مُھم گوں گیشیں تیزی ءَ برجاہ مان اَنت۔
