حقانی روچ ءِ کلوہ: “مئے حق، مئے باندات، ھما وھد ءَ” ماں بلوچستان ءَ گوشگ بیت

حقانی روچ ءِ کلوہ: “مئے حق، مئے باندات، ھما وھد ءَ” ماں بلوچستان ءَ گوشگ بیت
کوئٹہ: انسانی ھکانی میان استمانی روچ ءَ بلوچ یکجہتی کمیٹی ءِ نیمگ ءَ کوئٹہ ءَ پریس کلب ءَ ’’ مئے ھک، مئے باندات، ھما وھد ءَ‘‘ سیمینار ءِ برجم دارگ بوت۔

دانشور، انسانی حقانی جہدکار، سیاسی رہشون، وکیل، نودربر، صحافی، ءُ زوراکی ءَ بیگواہ کنگ ءِ آماچیں مردمانی کھول ءِ یک جتائیں گلے ءَ بلوچستان ءِ انسانی حقانی زوراکیں جیڑہانی سرا گپ ءُ تران کنگ ءِ ھاترا یکجاہ بوتگ انت۔
سیمینار ءِ پرامنیں نیت ءِ باوجود ریاستی واکداراں اے مراگش ءَ بازیں رنگے ءَ رکاوٹ جوڑ کنگ ءِ جہد کتگ کہ اے بلوچ راج ءِ سرا برجاھیں ریاستی سرکوب ءِ عکس اِنت۔

اے سیمینار ءِ تہا انسانی حقانی جہانی اعلامیہ ءِ یات ءَ بلوچ راج ءِ حقانی برجاھیں لگتمالی ءِ سرا چمشانک دیگ بوتگ کہ ایشی ءِ تہا زوراکی ءَ بیگواہ کنگ، جعلی مقابلہ ءُُ نظامی تبعیض ھوار انت۔

پینل ڈسکشن، یک دستاویزی فلمے، ءُ گشتانک پیش کنگ بوتگ انت کہ اے ظلم ءُ زوراکیانی بابت ءَ سرپدی دیگ بہ بیت ءُ بلوچ راج ءِ سرا زوراکی ءِ بند کنگ ءِ ھاترا زوتیں گامگیج ءِ لوٹ کنگ بہ بیت۔
بلے اے مراگش پاکستانی سرکاری لشکر ءِ زانتگیں کوشستاں چہ ھراب بوتگ کہ آ ھواریں مردمانی دیم ءَ رکاوٹ جوڑ بہ کن اَنت ءُ سیمینار ءَ را ھراب بہ کن اَنت۔

کوئٹہ انتظامیہ ءَ گوں دمگی پولیس ءَ ھمگرنچی ءَ چہ ھواریں مردماں چہ زاتی ھال ءُ اھوال لوٹ اِتگ اَنت – چوش کہ نام، مات ءُ پت ءُ CNIC (نیشنل شناختی کارڈ) ءِ نمبر – چہ پریس کلب ءَ ھوار بوھگ ءِ اجازت دیگ ءَ پیسر۔

بی وائی سی ءَ وتی بیان ءَ گْوشتگ کہ اے ناگواریں گامگیج بلوچ سیاسی ءُ انسانی ھکانی کارکنانی پروفائل کنگ ءِ پندل اِنت ءُ آؤکیں وھد ءَ آزار ءُ اذیت ءُ قانونی کارروائی ءِ آماچ بنت۔

ھمے وڑیں سرکوب ءِ پندل سرجمیں بلوچستان ءَ گندگ بوتگ اَنت کہ اودا بی وائی سی ءَ بلوچ راج ءِ ھلاپ ءَ پاکستانی ریاستی لشکر ءِ نیمگ ءَ برجاھیں انسانی ھکانی لگتمالی ءِ سر ءَ چمشانک دیگ ءِ ھاترا پرامنیں جلسہ ءُ زھرشانی ءِ بندوبست کتگ۔

حب چوکی ءَ انتظامیہ ءَ لسبیلہ پریس کلب ءِ دروازگ ءَ گوں گند ءُ نند ءِ ٹرکاں بند کتگ ات کہ دمگ ءَ انسانی حقانی لگتمالی ءِ سرا چمشانک دیگ ءِ مول ءُ مراد ءَ چہ راج ءِ سرپدی ءِ راہ ءَ چہ رکّینگ بہ بیت۔

تربت ءَ ھم دمگی انتظامیہ ءُ پولیس ءَ ھمے رنگ ءَ انسانی ھکانی روچ ءَ بی وائی سی ءِ دگہ سیمینارے ءَ مردین ءُ جنین بھر زوروکاں پروفائل کنگ ءَ سبوتاژ کنگ ءِ کوشست کتگ۔

بی وائی سی ءَ المی ئیں نو اوبجیکشن سرٹیفکیٹ (NOC) ءِ گرگ ءُ اے سیمینارانی برجم دارگ ءِ ھاترا درستیں سٹینڈرڈ پروسیجر ءِ پیلو کنگ ءَ ابید ھم ریاستی واکداراں بلوچ آبادی ءِ بنیاتی ھک ءِ سرا لگتمالی کتگ ات کہ آھانی تہا لبز ءِ آجوئی، مچی ءُ پرامن زھرشانی ءِ ھک ھوار اتنت۔

اے کار کہ 1948 ءَ پاکستان ءِ دستخط کتگیں یو ڈی ایچ آر ءِ اصولانی سرا براہ راست تضاد کن انت، ریاست ءِ ہما انسانی حقانی سرا برجاھیں بے اعتباری ءِ درشان کن انت کہ آہانی رکھینگ ءِ پابند انت۔

سیمینار ءِ جارچیناں اے ناجائزیں کارانی مذمت کتگ ءُ گشتگ کہ اے کار پہ انصاف ءَ بلوچ ءِ جنز ءِ سرکوب کنگ ءِ پراھ ءُ شاھگانیں پندل ءِ بھر اَنت۔

’’اے گپ پدّر اِنت کہ پاکستانی ریاست زانت ءُ زانت ءَ بلوچ راج ءَ بے انسانیت کنگ ءَ اِنت، بلوچستان ءَ را ’’انسانی ھکانی آزاتیں دمگ‘‘ جوڑ کنگ ءَ اِنت۔ ” بی وائی سی ءَ گْوشتگ۔

بی وائی سی ءِ جارچین ڈاکٹر ماہ رنگ بلوچ ءَ وتی چمشانک داتگ۔
” انسانی حقانی روچ ءَ ما گوں بلوچستان ءِ سختیں حقیقت ءَ دیم پہ دیم بوھگی اِنت۔ اے روچ چہ تاریخ ءَ گیش اِنت؛ اے یک دعوت یے کہ چہ نژاد، عقیدہ ءُ اصل ءَ ابید درستیں مردمانی شرپ، آجوئی ءُ حقانی برجائی ءَ بہ کنت۔

ہفتاد ءُ شش سال پیسر اقوام متحدہ ءَ انسانی حقانی جہانی اعلامیہ ءِ منظوری داتگ کہ آئی ءِ تہا زندگی ءِ حق، آجوئی، ایمنی ءُ چہ شکنجہ، تبعیض ءُ وتی مرضی ءِ بندیگ کنگ ءَ آجوئی ءِ حق ءِ تصدیق کنگ بوتگ۔

اے حق جہانی انت، پدا ہم بلوچستان ءَ اے دوریں وابے ءِ بستار ءَ مانیت۔ دہائیاں بلوچستان ءَ زوراکی ءَ بیگواہ کنگ، غیر عدالت ءَ کشگ ءُ نظامی سرکوبی ءِ آماچ بوتگ۔ ھاندان بے تواری ءَ گریوگ ءَ اَنت، گاریں نزیکیں مردمانی شوھاز ءَ اَنت ءُ ذمہ واریں مردم بے سزای ءَ کار کن اَنت۔

جوانیں مرد ءُ جنین کہ بس وانگ ءُ زانگ، جان سلامتی ءُ وسیلہ ءِ لوٹ ءَ کن اَنت، آھاں غدار گْوش اَنت۔ صحافی بے توار کنگ بنت، ءُ کارکن آزار ءُ اذیت ءِ آماچ بنت۔ مئے طبیعی زر ءُ مال ءِ درآمد کنگ بیت وھدے کہ مئے مردم غربت ءِ تہا زند گوازینگ ءَ انت۔ مدرسه، بیمارستان، و میتگاں منابع بنیادی ءِ کمی انت، ءُ دیمروئی ءِ حق ءَ چہ زبھر کنگ بیت۔

اے ناانصافیانی پد ءَ ھم بلوچ راج ءِ سیاد ءُ تچک ھست اِنت۔ مئے راج ءِ گریوگ -عدالت، برابری ءُ شرپ ءِ گوما زند گوازینگ ءِ حق ءِ لوٹ – مئے مھروانیں سرڈگار ءِ کوہ ءُ صحرا ءِ تہ ءَ گوشدارگ ءَ اَنت۔ اے گریوگ ءُ زاری بے گوشدارگ ءَ مہ بنت۔

حقوق انسانی خلاصہ نہ انت؛ آہاں ہر روچ برجاہ دارگی اِنت۔ بلوچستان امن، انصاف، ءُ شرپ ءِ مستحق انت۔ داں زلم ءُ زوراکی بیت ما مزاحمت کنیں۔ داں ھاموشی ھست ما گپ کنیں۔ داں کہ اُمیت ھست ما پہ شرتریں باندا ءِ ھاترا جھد کنیں۔”

مراگش ءِ آسر ءَ میاں اوستمانی براتی ءَ را پاکستان ءِ بار باریں انسانی ھکانی لگتمالی ءِ سرا احتساب کنگ ءِ لوٹ کنگ بوتگ ءُُ ھرکس ءَ را انصاف ءُُ برابری ءِ جنگ ءَ ھوار بوھگ ءِ لوٹ کنگ بوتگ۔

بی وائی سی ءِ کلوہ ہمیش اِنت کہ بلوچ ءِ حقانی جہد ایوک ءَ لوکلے نہ اِنت

مسئلہ ءِ سرا ، بلے یک جھان ءِ مسئلہ یے کہ زوتیں دلگوش ءُ گامگیج ءِ لوٹ کنت۔

ریاست ءِ نیمگ ءَ ایر کنگ بوتگیں رکاوٹانی باوجود بی وائی سی ءَ وتی اے جزم ءِ پدا پدر کت کہ آ بلوچستان ءَ انسانی حقانی لگتمالی ءِ بابت ءَ سرپدی ءِ دیم ءَ برگ ءَ برجاہ بہ بیت ءُُ یک انچیں باندات ءِ نیمگ ءَ کار بہ کنت کہ اودا بلوچ راج چہ ترس ءُُ بیم ءَ آجو زندگ بہ بیت۔